Elbasy Belarýs Respýblıkasynyń Prezıdenti Aleksandr Lýkashenkomen kezdesti, - Qamshy.kz Aqordaǵa silteme jasap. 

Kezdesý barysynda saýda-ekonomıkalyq, ǵylymı-tehnıkalyq jáne mádenı-gýmanıtarlyq yntymaqtastyqty odan ári nyǵaıtý máseleleri talqylandy. Memleketter basshylary halyqaralyq kún tártibindegi ózekti jaıttar jóninde de pikir almasty. Qazaqstan Prezıdenti eki el arasyndaǵy qarym-qatynas odaqtastyq sıpatymen erekshelenetinin atap ótti.

– Bizdiń respýblıka – Belarýstiń jetekshi ekonomıkalyq seriktesiniń biri. Jumsalǵan kúsh-jiger arqasynda sońǵy jyldarda kóptegen birlesken kásiporyndar quryldy. Ózara  taýar aınalymynyń deńgeıi qazirgi ahýalǵa baılanysty azdap tómendedi, biraq onyń naqty jalpy kólemi sol qalpynda qaldy. Elderimizdiń ıntegrasıa máselelerine qatysty kózqarasy ortaq, halyqaralyq saıasatta da ustanymdary uqsas. Biz Sizben turaqty túrde kezdesip otyramyz, qazirgi kezde strategıalyq yntymaqtastyqty odan ári damytý jumysyn júrgizýdemiz. Kóptegen máseleler boıynsha, sonyń ishinde Evrazıalyq ekonomıkalyq odaq aıasyndaǵy ózara is-qımyl, óńirdegi jáne tutas álemdegi ahýal jóninde pikir almasý úshin bizdiń kezdesýimizdiń mańyzy zor, – dedi Memleket basshysy.

Aleksandr Lýkashenko qazirgideı kúrdeli jaǵdaıda senimge negizdelgen mundaı kelissózderdiń árdaıym paıdaly ekenin atap ótti.

– Byltyr bizdiń aramyzdaǵy taýar aınalymynyń deńgeıi tómendedi. Bul úderisti keri baǵytqa túsirý qajet. Biz – bir ekonomıkalyq odaqta jumys júrgizip otyrǵan jaqyn memlekettermiz. Bizge qarym-qatynasymyzdyń irgetasyn – saýda men ekonomıkany nyǵaıtqan jón, onyń ústine biz qaı jolmen ilgeri basýymyz kerektigin aıqyndap ta aldyq. Bul baǵytta jasalǵan nárse az emes, biraq bizge osy jaǵdaıdan tezirek shyǵý úshin qarym-qatynasymyzǵa tyń serpin berý kerek. Halyqaralyq arenada biz sizdiń elge BUU aıasynda da, sondaı-aq jahandyq qujat – «Álem. XXI ǵasyr» manıfesine qatysty da qoldaý bildiremiz. Biz kóptegen baǵyttar boıynsha Qazaqstan tarapymen birlese jumys júrgizýge ázirmiz, – dedi Belarýs Prezıdenti.