AITÝǴA OŃAI... Kóńilim qaldy... Aıtýǵa ońaıǵa ókpem qara qazandaı... Áı, ózime de obal joq-aý! Nege bardym eken? Nege? "Berdibek Soqpaqbaev jaıly túsirilim jasamaqpyz" degen soń, qustaı ushyp edim. Berdibektiń ómiri, shyǵarmashylyǵy jaıly bar biletinimdi, oıǵa túıgenimdi aıtsam dep edim. Ólimi jaıly da kókeıde biraz jaıt sarnap jatyr. Biraq, barlyq oıym kesilip tastalypty. Efırge jibergenderi bir aýyz sóz. Aqyry qıǵysh eken, ala salmady ma? Mensiz de, sol baǵdarlama "keremet" bolyp jarq ete qalar edi ǵoı. Berdibektiń qalaı ólgeni jaıly úsh nusqa bar. Birinshisi - otbasylyq kıkiljiń. Keıingi jeńgeıden týǵan eki ulynyń tárbıesine qatysty túrli áńgimeler aıtylǵan bolatyn. Aıtyla beredi de. Ekinshisi - "Ólgender qaıtyp kelmeıdiniń" memlekettik syılyqty ala almaı qalýy. Bul óz dárejesinde jazýshynyń psıhologıasyna áser etpeýi múmkin emes. Úshinshisi qazir ekiniń biri aıtyp júrgen BUU-na hat jazbaq bolǵany. Keńestik ıdeologıaǵa qarsy shyǵýy. Men alǵashqy ekeýin aıta otyryp, joqqa shyǵardym. Óz basym úshinshi nusqaǵa senetinimdi aıttym. Al, "Aıtýǵa ońaılyqtar" buǵan pysqyrmapty da. Alǵan da, qıyp tastaı salǵan. Sonda deımin-aý, men ómirden qaıtyp ketken Qadyr Myrza-Áliniń jáne sol túsirilimge qatysqan Amanhan Álimniń oıyn qaıtalaý úshin baryppyn ba? Járáıdi, bul qysqardy deıik. Men Berdibek aǵamyzdyń 17 jyl boıy eńteńe jazbaýy múmkin emes ekenin dáleldep turyp sóılegen edim. Sol 17 jyldyń ishinde aǵamyzdyń dym jazbaýy múmkin emes. Demek, shyǵarmalary qoldy boldy degen sóz. Bul oıym da joq. Esesine Beksultan Nurjeke aǵamnyń maǵan qarsy pikiri ǵana júr. Ol kisi "Ólgender qaıtyp kelmeıdini" 1984 jyly jazyldy dedi. Men aǵamyzdyń jaǵasynan alýdy mádenıetsizdik sanap, tynysh otyr edim, meniń oıymdy Berdibek aǵanyń úıindegi jeńgeı rastap, bul shyǵarmanyń ózderi ajyraspaı turǵanda jazylǵanyn dáleldep berdi. Qudiretińnen aınalaıyn, "Aıtýǵa ońaı" ony da belinen syza salypty. Sosyn baǵdarlamanyń aıaǵynda taǵy eki-aýyz sózim jylt etti. Aldyndaǵy hám artyndaǵy oılarym qıylǵannan soń, onyń da berekesi qalmapty. Aýyldaǵy aǵaıynnan, sony kórgen meni tanıtyn adamdardan uıat-aı! Budan keıin kórmegenim, barmaǵanym - "Aıtýǵa ońaı" bolsyn! Osy baǵdarlamada jumys jasaıtyn, ózim jaqsy kóretin baýyrlarym bar. Sol baýyrlaryma aıtarym mynaý... Meni kloýn jasap qoıǵandaryńyz úshin rahmet... Dúnıe alma kezek qoı..