Aqyn, qoǵam qaıratkeri, aqyndar aıtysynyń uıymdastyrýshysy Júrsin Erman aıtystan ketip jatqan keıbir aqyndardyń áreketin ásiredinshildikpen baılanystyrady. Ol bul oıyn «Almaty» telearnasyndaǵy «Ótkir til» baǵdarlamasynda aıtqan, - dep jazady Qamshy.kz.

«Aıtysker aqyndar aspannan túsken joq. Olar da osy qoǵamnyń múshesi. Qazaq qoǵamy qandaı bolsa, aıtyskerler de sondaı. Mysaly, qazaq qoǵamynyń dinge bet burǵanyǵyna biraz bolyp qaldy. Solardyń ishinde ásire dinshilder de, ótirik dindi nasıhattap júrgender de, óziniń namaz oqıtyndyǵyn nasıhattaý arqyly arzan upaı jınap júrgender de tolyp jatyr. Bizdiń aıtyskerlerdiń arasynda bireń-sarań bolsa da solaı júrgender bar. Dinge shyrmalyp qaldy ma, aıtystan ketip jatqandary da bar. Balǵynbek bastaǵandar. Kóz kórip otyryp, ony ne úshin jasyramyz? Tilin baılaıtyn bolý kerek. Basqa syltaý joq. Men Balǵynbekti jaqsy kóremin. Asa talantty aqyndarymyzdyń biri, osy aıtysty bıikke kótergen sanaýly tulǵalardyń biri. Biraq túsinbeımin onyń áreketin. Ásire dinshildik aıtystaǵy aqyndardyń tilin baılaıdy eken. Jastardyń sanasy álsiz ǵoı. Solar shyrmatylyp qaldy», - deıdi Júrsin Erman.