Ótken jyly el Úkimeti birqatar paıdaly qazbalardyń ken oryndaryn aýksıon arqyly satý týraly sheshim qabyldaǵany belgili. Sodan satylymǵa qoıylatyn oryndardyń tizimi jasalyp, aýksıonǵa shyǵaryldy. Osy kúnge deıin aýksıonǵa qoıylǵan 100 ýchaskeniń 49-y ıesin tapty degen aqparat ta taraǵan edi. Alaıda, úkimettiń bul bastamasy baıansyz bastama bolyp otyr. Sáýir aıynda jarıalanǵan osyndaı bir aýksıon satyp alatyn áleýetti ınvestordyń tabylmaýyna baılanysty toqtatylǵan edi. Endi Investısıalar jáne damý jónindegi mınıstrlik 16 maýsymǵa josparlanǵan taǵy bir aýksıondy ótkizbeıtin bolyp otyr.
Buǵan deıin ótken aýksıondar aǵylshyn ádisimen, eń kóp baǵa usynǵan qatysýshyǵa berilip keldi. Máselen, Qaraǵandydaǵy Mystóbe altyn keni orny 991 myń teńgelik baǵamen bastalǵan aýksıonda 240 mıllıon teńgege satylǵan. Resmı aqparat kózderi sol jolǵy aýksıonda búdjetke bir jarym mıllıard teńge qarajat túskenin aıtady.
Osyndaı nátıje maýsymdaǵy aýksıonnan da kútilgen kórinedi. Óıtkeni, ol aýksıonǵa da Aqmola oblysyndaǵy «Komsomol ýchaskesi» altyn keni orny (bastapqy baǵasy 9 436 myń teńge), SQO-daǵy Qaratal almaz ken orny (bastapqy baǵasy 600 myń teńge) syndy baı ken oryndary qoıylǵan bolatyn. Biraq, osyǵan qaramastan eshbir kompanıa men qaltaly azamat bul ken oryndaryn satyp alý jónindegi aýskıonǵa ótinish bermegen. Mamandar muny salalyq mınıstrliktiń jumysyndaǵy áli de sheshilmegen shıkiliktermen baılanystyrady. Olaı deıtinimiz, aýksıonǵa qoıylatyn 101 nysannyń 88-ine áli geologıalyq barlaý jumystaryn júrgizý qajet kórinedi. Iaǵnı, ony satyp alýshy geologıalyq zertteý jumystarynsyz qandaı paıda tabatynyn aldyn ala naqty esepteý múmkindigi joq. Sondyqtan da, mundaı kúmándi jobaǵa aqsha salýdan tartynady. Onyń ústine, geologıalyq barlaý jumystarynyń da shyǵyny az emes.
Uzaq merzimdi mundaı jobalarǵa qarjy quıýǵa sheteldik ınvestorlardyń da asyǵatyn túri kórinbeıdi. Aýksıon ótip, jeńimpaz anyqtalýy úshin oǵan qoıylǵan árbir ken ornyna keminde eki qatysýshy ótinish berý kerek kórinedi. IDM basshysynyń orynbasary Albert Raý aqparat quraldaryna maýsymda ótýi tıis aýksıonǵa shyǵarylatyn ýchaskelerge tek bir ǵana ótinishten túskenin habarlapty.
Bul rette otandyq kásiporyndardyń jańa ken oryndaryn satyp alýǵa ne sebepti qulyqsyzdyq tanytyp otyrǵany túsinikti. Qazir Qazaqstanda qarjylyq qıyndyq kórmeı otyrǵan kompanıa joqtyń qasy. Al, sheteldikterdiń qyzyǵýshylyq tanytpaýyn eldegi saıası ahýal men bolashaqtaǵy turaqtylyq máselesine baılanysty alańdaýshylyqpen ǵana baılanystyrýǵa bolar.
Darhan Muqantegi
