2016 jyldyń 1 maýsym kúni Astana qalasynda «Shabyt» óner akademıasynda «Aýyl» HDPP-nyń uıymdastyrýymen «Azattyǵym - ǵajap kúnim» atty jyr antologıasynyń tusaýkeseri jáne jyr músháırasy ótti, - dep habarlaıdy Qamshy.kz.
Sharany «Aýyl» partıasy Qazaqstan Táýelsizdiginiń 25 jyldyq mereıtoıyna oraı arnaıy uıymdastyryp otyr. Alqaly jıynǵa 300-den astam delegat qatysty. Olardyń arasynda alys jaqyn shetelden kelgen 100-ge jýyq qazaq qandasymyz da bar.
Tusaýy kesilgen «Azattyǵym - ǵajap kúnim» jınaǵyna álemniń ár túkpirinde júrgen qazaq aqyn-jazýshylarynyń Qazaqstan Táýelsizdigine, týǵan elge, patrıotızmge baǵyttalǵan óleń jyrlary engen. Antologıaǵa Monǵolıada turyp jatqan 15 qazaq aqynynyń, Qytaıdaǵy qazaq dıasporasynyń 40 ókiliniń, Reseılik 5 qazaq aqynynyń án-jyrlary men Qazaqstandyq 45 aqyn-jazýshylardyń eńbekteri jınaqtalyp otyr.
Jıynǵa qatysýshylardy quttyqtaǵan «Aýyl» HDPP-nyń tóraǵasy Á.Bektaev «Táýelsizdik – esh nársemen salystyrýǵa kelmeıtin uly nyǵmet. Tek táýelsiz el ǵana oıyndaǵy asqaq armandaryn júzege asyryp, jarqyn ómir súre alady», dep atap ótti. Onyń aıtýynsha, «Qazaq eli Táýelsizdik alǵan sátte, ásirese shetelde júrgen qarakóz qandastarymyz bórkin aspanǵa atyp qýandy. Táýelsizdik jat jurtta júrgen zamandastarymyzdyń keleshek taǵdyryn aıqyndap berdi. Shette júrgen qandas baýyrlar sol kezeńnen bastap lek-legimen atamekenine orala bastady». «Qazaqstan Táýelsizdiginiń qadir-qasıetin shette júrgen qandastarymyz erekshe túsinip, joǵary baǵalaıdy», - dedi ol.
Sondyqtan da, sheteldik qandastardyń qalamynan tógilgen eli men jerine, atamekenine degen saǵynyshy men ultyna degen ystyq sezimi qatar órilgen jyr monshaqtary árbir jannyń júregin dir etkizip, sanasyn silkintetin kúshke ıe.
«Azattyǵym - ǵajap kúnim» jyr antologıasynyń tanystyrylymynan soń, aqyn-jyrshylar Táýelsizdikke arnaǵan óleń jyrlaryn oqyp, jınalǵandardyń qoshemetine bólendi. Jyr músháırada erekshe sýyrylyp kózge túsken qalam ıelerine arnaıy dıplomdarmen syılyqtar tabystaldy.
