Pýtınshaldyń "sharık" kúshikteri Qazaqstanǵa qarap sháýildeýin qaıta bastady. Orystyń saıasatker-symaǵy Edýard Lımonov Qazaqstannyń Soltústigi men Shyǵysyn bólip alý kerek ekendigin aıtqan beınematerıaly ǵalamtordy kezip júr.
Bul materıalda Lımonov: "Orystar ózderi negizin qalaǵan qalalar men atyn ataǵan jerlerdi qaıtaryp alý kerek. Orystar qonystanǵan eldi–mekender Reseıge qaıtarylýy tıis. Aktúbınsk, Petropavlovsk, Semıpalatınsk, Pavlodar, Ýst-Kamenogorsk ... – bular orystyń qalalary. Qalaısha ol Qazaqstannyń jeri bolýy kerek?" – dep bósti Lımonov.
Bul Lımonovtyń birinshi ret Qazaqstanǵa kóz alartýy emes. Osyǵan deıin aqpan aıynda: “Qazaqstanda memleketke qolaısyz devalvasıa, prezıdent Nazarbaev qartaıyp barady, naqty murageri joq”,- dep jazǵan. Facebook paraqshasynda. Ol: "Ýkraınanyń da taǵdyry Reseımen baılanysty, shyǵys aımaqtary da Máskeýdiń qol astyna kirý kerek" degen bolatyn. Bul sandyraǵy aıdaı anyq keldi.
Syrtqy ister mınıstrligi mamandary reseılik áriptesterine Lımonov “usynysynyń” pozısıasyna qatysty túsindirýdi talap etken nota joldaýdy uıǵarǵan bolatyn. Sóıte tura, “Reseı – bizdiń dosymyz, Qazaqstannyń odaqtasy ári strategıalyq seriktesi. Lımonovtyń aqylǵa syımaıtyn málimdemesiniń Reseıdiń Qazaqstanǵa qatysty syrtqy saıası baǵytyna qatysy joq. Biz reseılik serikterimizdiń Lımonovtyń oǵash áreketine tıisti baǵasyn beretinine eshqandaı kúmán keltirmeımiz”, -dep máımóńkelegen mınıstrliktegiler. Alaıda, Reseı tarapy miz baqqan joq, pysqyryp ta qaramady. Budan keıin "jýas túıe júndeýge jaqsy" deıtin V.Jırınovskıı de Qazaqstandy qosyp alý kerektigin aıtty. Oǵan taǵy biraz daýryǵyp basyldyq, bizdiń tarap taǵy lám– mım deı almady.
Lımonov bizdiń SİM–niń bul dármensizdigin de tilge tıek etýdi umytpady: "Qazaq SİM Reseıdiń SİM–ne hat joldapty. Al, olar maǵan ne isteı alady? Ózderiniń keliskenderin qulaǵyma sybyrlap aıta ma?
Bul ne basynýshylyq? Qashanǵy biz osyndaı qorlyqty kóre beremiz? "Ura berse, kıiz qazyq ta jerge kiredi". Bizdiń keıbir tarıhty bilmeıtin, til men dilden dilden jurdaı azamatarymyz Lımonovtyń osyndaı daqpyrtyna senip qalmasyna kim kepil? Álem ne oılaıdy? Qazaqtyń KSRO quramynda bolǵanyn jaqsy biledi. Lımonov sekildilerdiń "absýrdtary" ras dep qabyldap, sońy lańǵa aınalmasyna kim kepil?
"Qamshy" silteıdi
