Ilá ınstagramda júıkemizdi juqartyp júr. Bizdiń ǵana emes-aý, ınstagramǵa tirkelgenderdiń báriniń shyǵar. Ol – ınstagramǵa eń kóp sýret júkteıtinderdiń biri. Meıli ǵoı…

Áıtse de, júktegen sýretterine qarap, chempıondy jattyǵý zalyna jattyǵý úshin emes, sýretke túsý úshin barady-aý dep oılap qalasyń. Jattyǵý zalyna kirgennen-aq Ilá «jattyǵýǵa keldim» dep sýretin jarıalaıdy. Sosyn qansha keli ziltemir kótergenin iledi. Ziltemirdi julqa kótergenin de, serpe kótergenin de sýretterinen bilip otyrasyń. Sekirse de, júgirse de, qysqasy ne istese de ınstagramǵa salady. Arasynda aına aldynda oılanyp, óz-ózine tesile qalatyny bar. Tústenýge barǵanyn da fotosynan ańǵarasyń. Osylaısha, azannan qara keshke deıin chempıonymyz sýretke túsýmen áýre. Sýretiniń astyna jazylǵan pikirlerdi oqysań, ınstagramdaǵylardyń bári de Ilány jaqsy kóredi. Rıoda da chempıon bolaryna qaltqysyz senedi. Muny salǵan sýretine bir mezette 800-den artyq adamnyń «laık» basqanynan-aq baıqaý qıyn emes. Jazylǵan jaqsy pikirler de sonyń dáleli. Alaıda, batyrymyzdyń bos nársege ýaqyt ketirip júrgeni birtúrli eken. Ilá Ilın óz-ózin bosańsytyp almasa boldy, áıteýir. Biz soǵan alańdaımyz.

Buryndary Iláǵa ne istese de jarasyp turatyn. Maqtansa da, masattansa da. Al ınstagramdaǵy jyrtaqaılyǵyn jaratpaı qaldyq. Erteń úlken dodalarǵa daıyndyǵy durys bolmaı jatsa, jattyǵý zalynda ınstagramǵa sýret júkteýmen áýrelengeni aldynan shyǵar. Esińdi jı, Ilá! Sen bizge úsh dúrkin Olımpıada chempıony bolamyn dep ýáde bergensiń!!!

"Aqjelken"