«Habar» arnasynda júrip jatqan «Juldyzdar aıtysady» tok shoýy sheteldik jobalarmen ıyq teńestire alatyn biregeı otandyq joba retinde dáriptelýde.

İs júzinde, Oryssha aıtys jasap, estradalyq ánderdiń áýenin maqam qylyp, aıtysty shoýǵa aınaldyrǵan tele arnalardyń prodúserleri nemese KVN-shikterdiń atamany emes, qazirgi Qazaq aıtys óneriniń úzdik ókili Balǵynbek Imashev bolatyn. Budan talaı jyl buryn, úkimetbasy Kárim Másimov bastaǵan sheneýnikter tamashalaǵan aıtysta «Eki tilge birdeı jettik edim» degen Balǵynbek áriptesi Rınatty Oryssha aıtysýǵa shaqyryp, resmı tilde aıtys úlgisin kórsetip, kópshilik kóńilinen shyqqan. Balǵynbektiń jańalyǵy ol ǵana emes, ejelgi maqamdarmen birge estradalyq ánderdiń áýenderin sheber paıdalana bilýinde. Jeke stıline aılandy desede bolady. Marqum Erjan Serikbaevtiń «Shymkent syrasy», «Tańǵy qala», «Meıli» ánderiniń, taǵy basqa da hıt ánderdiń áýenimen tógiltken shýmaqtary el aýzynda júr.

 Daıyn asqa kim tik qasyq bolmasyn?! İle-shala Reseılikterdiń «Nasha Rasha» jobasynyń óńin aılandyryp, «Nasha Kazasha» dep usynǵan Nurtas Adambaev aýzymen dombyra oınap, oryssha mandyraıtyn aqyn obrazyna enip, Orys tildi qaýymdy kúlkige keneltken.

Alǵashynda konsert formasynda ótken «Juldyzdar aıtysady» jobasy efırde kórsetilgennen-aq synnyń astynda qalǵan edi. «Habar» arnasynyń joqtan tapqandaı, formatyn ózgertip, qaıta usynǵanyna jol bolsyn.

Rınat Zaıytov bir kezde, aıtys aqyndarynyń bir-birine aıtarlaryn aldyn-ala jazyp kórsetip, ózara kelisip alyp aıtysatynyn jaıyp salǵan edi. «Juldyzdar aıtysady» jobasy sonyń naqty kórinisi. Jazyp bergendi jattap alyp, sahnada jańa qyry ashylǵan adýyndy aqyn beınesine engen juldyzdardyń tirligi aıtystan-góri ájýaǵa saıady. Qazaqtyń aıtys óneriniń jany – sýyryp salmalyq ekenin eskersek, jobany usynýshylardyń áreketi aıtysty ósirý me, álde óshirý me?

Esbol Úsenuly