Elimizge Qytaıdan keletin avtobýstar shetinen ustalyp jatyr. Úrimji-Almaty baǵytynda jolaýshy tasymaldaıtyn kólikterge birneshe kúnnen beri reıd júrgizilýde. Óıtkeni olardyń qujattarynda tek Qytaımen shekaralas Shonjy aýylyna deıin ǵana kelýge ruqsat bar. Alaıda avtobýs júrgizýshileri zańdy belsheden basyp, Almatyǵa deıin adam ákelip júr, - dep habarlaıdy Qamshy.kz KTK arnasyna silteme jasap.
Kólik baqylaý ınspeksıasy men jol saqshylary tórt kúnnen beri Almaty-Qorǵas tas jolyn toryp júr. Sebebi sońǵy ýaqytta Qytaıdan adam tasymaldaıtyn avtobýstar Almatyǵa zańsyz kiretin bolǵan. Iaǵnı Úrimji-SHonjy baǵytynda da ǵana qatynaýy tıis kólikter ońtústik astanaǵa deıin ótip ketedi eken.
Qanat Mámethanov, Almaty oblystyq kólik baqylaý ınspeksıasynyń bas mamany:
-Qazirgi tańda Qazaqstanǵa zańsyz kiretin avtobýstardyń sany ósip jatyr. Shonjydan toqtamaı Almatyǵa ótip ketip jatyr. Sol turǵyda avtobýstardy toqtatyp, tekserip hattama toltyryp, KAT-taryn alyp qalyp jatyrmyz.
Alaıda budan Qytaılyq júrgizýshilerdiń qyly da qısaımaıtyn sekildi. Sebebi aıyppul kólemi tym az. Iaǵnı bóten elge ruqsatsyz kirgeni úshin bar joǵy on myń teńge tóleıdi eken. Al aspan asty elinde dál osyndaı zańsyzdyq úshin teńgege shaqqanda shamamen bir mıllıon aıyppul qarastyrylǵan. Sondyqtan bizdegi zańnyń osaldyǵyn ońaı paıdalanǵan sheteldikter zańsyz áreketin toqtatar emes.
-Biz bilmeımiz. Ony bastyqtan sura Taıyr degen. Bastyq jiberse kele beremin. Aıyppuldy kompanıa tóleıdi.
Osylaı shirengen sheteldik júrgizýshilerdiń qýlyǵyna da quryq boılamaı tur. Iaǵnı tórt kúnnen beri reıd júrip jatqanyn estigender endi jolaýshylardy aldaýǵa kirisken. Iaǵnı Almatydan jolǵa shyqqandardy basqa kólikpen qala syrtyna shyǵaryp , ary qaraı óz avtobýstarymen áketedi eken.
Alaıda arnaıy reıd barysynda bul áreketteri de áshkere boldy. Tún ortasynda jolda qalǵan jolaýshylar aldanyp qalǵandaryn bilip shý shyǵardy.
-İshinde aýzy berik adamdar bar. Aýrý qyldy aqyr aıaǵynda. Kereýeti bar avtobýsqa salamyz degen. Mynaý urlap ákep tún ortasynda osyndaı qyldy.
-Ol avtobýs sizderdi shekaradan shyǵara almaıdy. Qujattary alynyp qoıǵan
Bazar jaǵalap, jolaýshy jınaıtyndardyń baǵasy da arzan. Kók tıyn salyq tólemeıtindikten olar Almatydan-Úrimjige deıin ár jolaýshydan 8 myń teńge alady eken. Budan otandyq tasymaldaýshylardyń kásibi turalap qalǵan. Sebebi avtovokzaldaǵy bılet baǵasy 12 myń teńge.
Razdan Danıal, avtobýs júrgizýshisi:
-Olar bazardan ketip jatyr. Adamnyń bárin áketip jatyr. Ana jaqtan da bazardan ketip qalady. Biz bir aıda bir shyǵamyz. Jumys joq. Adam joq...
Búgingi reıd barysynda Qytaılyq avtobýstardan bólek zańǵa baǵynbaǵan jeńil kólikter de ustaldy. Aspan asty elinen jarysqa kele jatqan bul azamattar temir tulparlarynyń terezesin tumshalap alǵan eken. Sondyqtan saqshylar bir jolǵa eskertý jasap, kúńgirt jabyndylaryn julyp tastady.
