Búginde birneshe kásiptiń basyn ustaǵan Toqtar Serikov ónerden ketpek. Ol munyń sebebin áriptesterine degen renishimen túsindirdi, - dep habarlaıdy Qamshy.kz Stan.kz -ke silteme jasap. 

Toqtar men Beıbit egizderi dúnıege kelgeli halyqqa kórinbeı júr. Beıbit úsh ulyna qaraılasa, Toqtar dombyrasyn jeke kásipke aıyrbastaǵan. Alaıda ánshilerdiń halyqqa kórinbeýiniń taǵy bir sebebi bar. Ol – syrǵa taǵyp, shashyn boıap, jyrtyq kıim kıgen áriptesteri men olardy qorǵaǵan aǵa býynǵa degen renishi.

“Mende syltaý joq. Tipti ne aıtarymdy da bilmeımin. Kishigirim kásipti qolǵa alyp, búginde mal sharýshylyǵymen, arnaıy tehnıkalar ázirleýmen aınalysyp júrmin. Aldaǵy ýaqytta egin sharýashylyǵymen de aınalyspaqpyn. Adam bolǵan soń birnársemen toqtap qalýǵa bolmaıdy. Dúnıedegi jalqaý adamnyń tańy men keshi birdeı. Kúnniń qalaı ótip jatqanyn bilmeı qalady. Arasynda tirlik jasap qalýy kerek.

Bala-shaǵam meniń arqamda ómir súrse dep armandaımyn. Álemniń eń myqty JOO-larynda bilim alyp, qazaq deıtin halyqqa súbeli úles qosatyn adam bolý. Osylar úshin qyzmet etemin. Bıznespen aınalysyp júrgenimdi esh jasyrmaımyn. Ony áriptesterimniń barlyǵy biledi”, – deıdi Toqtar Serikov.

Ánshi syltaýym joq dese de, halyq aldyna shyǵyp óner kórsetpeýiniń taǵy bir sebebi bar. Ásirese jas býynǵa “advokatshyl” bola qalatyn býynǵa ókpelep júrgenin kesip aıtty.

“Kıeli sahnamyzda shashyn boıap, qulaqtaryna syrǵa salyp, aýlary salaqtaǵan ánshiler qaptap ketti. Solardan jıirkengennen ketkim keledi, ketip baramyn. Qulaqtaryna syrǵa salatyn baýyrlarym, astagfırýllah olar meniń baýyrlarym emes.

Baýyrlarym bolmaı-aq qoısyn. Budan ózge tizesi jyrtyq kıim kıetin qaryndastarym bar. Solardy kórgen kezde sahnadan ketkim keledi. Qazaq sahnasy olardy mensinbeýi kerek. Solardy jaqtaǵan aǵa-apalaryma ókpelimin”, – deıdi ánshi.