Qaraǵandyda kómir baıytý jónindegi jańa kásiporyn ashyldy. Onyń ashylý saltanatyna kásibı sharshy alańda tapqan tabysyn osy jobaǵa ınvestısıa retinde quıǵan álem chempıony Gennadıı Golovkın qatysty, - dep habarlaıdy Qamshy.kz BNews.kz -ke silteme jasap.

Búgin Qaraǵandyda óndiristik qýattylyǵy jylyna 500 myń tonna Ekibastuz jáne Qaraǵandy ken oryndarynan óndirilgen kómirdi baıytatyn fabrıka ashyldy.

Atalmysh jobaǵa «KAZFerrıt» jergilikti kásipkerleri, «Samuryq-Qazyna» ulttyq ál-aýqat qory, sondaı-aq qazaqstandyq boksshy, álem chempıony Gennadıı Golovkın atsalysyp otyr.

— Ákem 35 jyl shahtada eńbek etti. Biz qara jumystyń qadirin biletin otbasynda óstik. Bul orta maǵan óte jaqsy tanys, atalǵan iske ómirin sarp etken mamandardy da bilemin. Men kenshilerdiń astanasy – Qaraǵandyda týyp-óstim, búgin aımaqtyń damýyna ózimshe osylaı úles qosyp otyrǵanyma qýanyshtymyn, – dedi Gennadıı Golovkın.

Ataqty sportshynyń aıtýynsha, ol ekonomıkaǵa ınvestısıa quıý arqyly eline paıda ákelgisi kelgen.

— Maǵan bul oı Memleket basshysynyń bárin jeńip, sosyn elge qaıt degen sol bir sózinen keıin kelgen bolatyn. Boksta áli de alar asýlarym bar. Biraq qazirden bastap elime ınvestısıa quıý arqyly paıdamdy tıgize alamyn dep sheshtim. Óıtkeni men úshin sport ózimdi tanytýdyń joly emes, men úshin elimniń atyn shyǵaryp, týymyzdy jelbiretý mańyzdy, sondyqtan meıli bızneste nemese sportta bolsyn, men elime paıda ákelýge tyrysamyn, – dep atap ótti Golovkın.

Kómirdiń sapaly qasıetterin arttyrýǵa baǵyttalǵan ınvestısıalar EAEO-da, keıin DSU-da qazaqstandyq kómir ónerkásibiniń básekege qabilettiligin arttyrýdyń negizi bolyp tabylady. Jańadan ashylǵan óndiriste 150 jumys orny qarastyrylǵan. Aldaǵy ýaqytta fabrıka keńeıip, damyp, óndiristi ulǵaıtpaq.

Kómirdi baıytý – ol barlyq baǵaly mıneraldardy bos jynystardan bólý maqsatynda kómirdi óńdeýdiń bastapqty prosesteriniń jıyntyǵy bolyp tabylady.