Ánshi, prodússer Qydyráli Bolmanov búgin «Ulytaý» tobynyń aldaǵy konsertine oraı ótken brıfıńte óziniń Reseı ǵylym akademıasynyń profesory ataǵyn alǵanyn málimdedi, - dep habarlaıdy Qamshy.kz.
«Qazir qaýyrt kez, halyqtyń esh ýaqyty joq. Sondyqtan halyq eshteńeni oılamaý úshin jeńil áýezdi mýzykaǵa qumar bola túsýde. Biz vırýstyq álemde ómir súrip jatyrmyz. Ol bizdi teledıdar, ınternet arqyly balabaqshada da, mektepte de jaýlap alǵan. Bul bizge, ásirese balalarymyzǵa túbegeıli qajet emes. Biz munymen «Bal bala» arqyly kúresýdi bastap kettik. Kompanıa ǵylymı-óndiristik oshaqqa aınalýda. Ǵalymdarymyz da bar, alǵashqy oqý-ádistemelik keshenimiz de daıyn bolyp qaldy. Dál osy máselege oraı men Máskeýde dısertasıa qorǵadym. Búgin men Reseı Ǵylym akademıasynyń profesory atandym. Biz óz keńistigimizdi, óz mádenıetimizdi, ásirese, ıdeologıalyq keńistigimizdi qorǵaýymyz kerek», - deıdi ánshi.
Sondaı-aq, Qydyráli Bolmanov óziniń shyǵarmashylyq ómir joly jaıynda kitap jazyp jatqanyn da tilge tıek etti.
«Men qazir kitap jazyp jatyrmyn. Keıde buralań, keıde qıyn, endi birde tamasha jetistikterge jol ashqan Amerıkadaǵy, Eýropadaǵy, Gran-prıdegi konsertterimizge kóz júgirtsem, Alla taǵalanyń bizdiń umtylysymyzdy elegeni-aý degen oıǵa ketemin. Tipti, biz Koroleva ordenin de aldyq», - deıdi Q.Bolmanov.
«Búgin, ásirese «Ulytaýdyń» jyldyq mereıtoılyq konserti aldynda eńbegimniń esh ketpegendigin sezinip otyrmyn. 20 jyldyń ishinde men ánshiler men jobalardyń tutas armıasyn qalyptastyrdym dep aıta alamyz. Keıde munyń barlyǵyna da qalaı úlgergenimdi túsinbeımin de», - dep qýanyshyn bólisti Bolmanov.
Aıta keteıik, «Ulytaý» etno-rok toby 6 shildede - elorda kúninde «Alaý» muz saraıynda konsert ótkizedi. Kelýshiler «Ulytaý» toby, Qaraqat Ábildına men Qydyráli Bolmanovtyń oryndaýyndaǵy erekshe jaryqtandyrýdyń súıemeldeýimen jańa jáne eski ánderdi tyńdaıdy. Mereıtoı ıelerin shyǵarmashylyqtaǵy áriptesteri men dostary da quttyqtaıdy.
