Álıa aýylyndaǵy mal aýrýy ózendegi mıkroorgazımder sebebinen bolýy múmkin. Bul týraly «Aqtóbe aqparat» ortalyǵynda ótken brıfıń barysynda oblys ákiminiń orynbasary Muhtar Jumaǵazıev aıtty, - dep habarlaıdy Qamshy.kz Aktobenews.kz -ke silteme jasap.

Osydan eki aıdaı ýaqyt buryn Aqtóbe oblysynyń Qobda aýdany Álıa aýylynda iri qara maly aýrýǵa ushyraǵan bolatyn. 10 kúnniń ishinde aýrý 160-qa jýyq malǵa juqqan. Keıin aýyl sharýashylyǵy mınıstrligi Veterınarlyq qadaǵalaý jáne baqylaý komıteti maldyń qyrylýyn zertteý barysynda pasterellez ben lesterezge qatysty klınıkalyq belgiler baıqalǵanyn aıtqan-dy.

— Mal aýrýǵa ushyraǵan boıda atalǵan komıtetten arnaıy mamandar keldi. Bul jaıttyń birneshe sebebi aıtyldy. Álıada eki jaıylym bar. Bir jaǵy batys jaǵyna qaraı, ekinshisi shyǵys jaǵyna qaraı jaıylady. Shyǵys jaǵynda jaıylatyn mal aýrýǵa ushyraǵan. Bul jaqta mal ózendi kesip ótedi. Boljam boıynsha, mal sýmen kelgen mıkroorganızmder saldarynan aýrýǵa ushyraǵan bolýy múmkin. Zertteý áli júrgizilip jatyr, — dedi Muhtar Jumaǵazıev.