Jer betindegi ár memlekettiń astanasynyń ózindik tarıhy men erekshelikteri bar. Búginde turǵyndarynyń sany 15 mıllıonnan asqan Tokıo shahary Japonıanyń tarıhy tereńnen bastaý alatyn astanasy retinde belgili. Bul qalanyń erekshelikteri kóp. Endi sonyń birazyna toqtalaıyq.
Búginde dúnıejúzindegi eń bıik munara Tokıoda ornalasqan. Bıiktigi 634 metr bolatyn álemdegi eń bıik telemunarany jasaýda japon arhıtektorlary myńdaǵan jyldyq tarıhy bar tájirıbeni paıdalanǵan. «Uzyn aǵash» japon jerindegi san-alýan bıiktigi 200 metrden joǵary bolatyn munaralardan da asady. Búkil álemniń arhıtektorlarynyń aýzyn ashtyrǵan, tańdaı qaqtyrǵan munaraǵa sandyq tele-radıo taratý júıesiniń antenalary ornatylǵan.
Edonyń shoq juldyzy bolǵan Asakýsa aýdanyna Tokýgava shıogýn Ioshıvara oıyn-saýyq ortalyǵyn jasap ketken. Sensoýdjı ǵıbadathanasynyń aldynan bastalatyn Asakýsa aýdany ejelden sheberler men sharýalar shahary bolǵan. Kagavanyń ýkıoe gravúrasynda Asakýsanyń alǵashqy kezeńindegi kórinisi beınelengen. Qansha ǵasyr ótse de aǵashtary da ornynda, dúkenderi de kóz aldyda tur.
Japonıanyń sımvoly Fýdzıama taýy Tokıonyń ońtústik batysyna qaraı 90 shaqyrymdyq jerde. Taýdy Tokıo qalasynan da kórýge bolady.
Altyn jaýǵan aımaq Akıhabara (Kúzgi japyraq jazyǵy) álemge elektr taýarlarymen tanymal. Edodzýboıýbý dep atalatyn Edo kartasyn kórkem beınelegen altyn shymyldyqta Akıhabara aıshyqtary aıryqsha ádemi. Kúmis keni Gındza Edo dáýirinde kúmis aqsha saraıy bolsa, búginde qarjy naryǵyndaǵy Tokıonyń mańyzdy aımaǵy retinde álemge tanymal.
Japon astanasynyń kóziniń qarasy Megýrogava ózeni Tokıonyń Ońtústiginen aǵyp jatyr. Jaǵasynda záýlim ǵımarattar boı túzegen Megýrogavanyń kópiri kóne zamanda Taıkohashı dep atalǵan. Doǵal kópirdiń pishini taıko urmaly aspabyna óte uqsas bolǵan. Edo dáýirindegi ózen kórinisi ýkıoe gravúralarynda ǵana saqtalǵan.
Japondar Tokıoda týǵandardy edokko dep ataıdy. Bul Edo uly degen sóz. Edo (Tokıonyń kóne ataýy) HÚIII ǵasyrda-aq dúnıejúzi boıynsha saýattylyq deńgeıi eń joǵary qala bolǵan. Ol kezde Edoda 1 mıllıon 30 myń adam turǵan. Al álemdegi iri qalalardyń biri Londonda halyq sany 700 myń bolsa, Parıjdi ol kezde jarty mıllıon kisi meken etipti.
Sharafat Jylqybaeva
japontanýshy
