Tarazda 158/4 túzetý mekemesinde úılený toıy ótti. Bostandyqta bastary qosylmaǵan jas jubaılar túrmede zańdy túrde nekelerin qıdy. Yntyq jandar bul kúndi jeti jyl kútipti, - dep habarlaıdy Qamshy.kz 31 arnaǵa silteme jasap.
Túrmedegi toıǵa bas quda retinde túrme basshylyǵy túgel qatysty. Kelin túsirýge túzetý mekemesi barynsha daıyndalǵan. Astanadan kelgen qalyńdyq toı úshin Tarazǵa kúni keshe taban tiregen. Kópten beri súıiktisin kórmegen kelinshek tolqynysyn jasyra almady. Al kúıeý jigit Oralbek Ahanovta tipten maza joq. Búgin qos júrek kezdesýge yntyq bolyp, uıqysyz ótkizgen túnderdiń óteýi retinde qýana qaýyshty. Kópshilik toı tórine jas jubaılardy bar sán saltanatymen shyǵardy.
Qolyna qusyn qondyrǵan Oralbektiń jasy 38 bolsa, Botakóz odan eki jas úlken. Túrmege deıin kóńilderi jarasqan jup azamattyq nekede bolǵan eken. Súıgenimen endi qosylaıyn dep júrgende Oralbek "esirtki satty" degen aıyppen 12 jylǵa sottalyp ketipti. Biraq qos ǵashyqqa bul kedergi bolmapty. Jeti jyl baılanys úzbegen jup búgin neke júzigin taqty.
BOTAKÓZ AIBEKOVA, Qalyńdyq:
- Osy ýaqytqa deıin bir-birimizben baılanysta boldyq. Syrlasyp, syrymyzdy aıtyp júrdik. Endi allaǵa shúkir osy kúnge jetkenimizge. Baqyttymyn, ár qashanda baqytty bolatynymzǵa senemin.
Alaıda jas shańyraqty tolyqqandy otbasy deýge áli erte. Oralbek taǵy bes jyl jazasyn óteýi tıis. Bostandyqtaǵy Botakóz bul kúndi de kútýge bar. Eki jasqa túrme basshylyǵy erekshe tartý daıyndapty. Toıǵa tartý bolsyn dep bal aıy retinde joldama bermese de, yntyq eki jasqa eki kún, eki tún birge bolýǵa múmkindik jasapty.
