Almaty oblysynyń Aqshı aýylynda jeke úılerdiń biriniń ájethanasynda tabylǵan náresteniń anasy ustaldy, - dep habarlaıdy Qamshy.kz Tengrinews.kz -ke silteme jasap. 

Anasy 1992 jylǵy qyz bolyp shyqty. "Ol Qarasaı aýdanynda tirkelgen. Ol bosanǵan úıge qonaq bolyp kelip júrgen. Úıdiń ıeleri - onyń týystary. 2 jyl buryn osyndaı qylmys jasaǵan. Sol ýaqytta bala shetinep ketken. Bul anyqtalady. Tergeý júrip jatyr", - dep habarlady oblystyq İİD ókilderi.

Eske salaıyq, Almaty oblysy İle aýdany Aqshı aýylyndaǵy úıdiń ájethanasynan jańa týǵan náreste 5 shildede tabylǵan edi. 

Kýágerdiń aıtýynsha, qyzdyń salmaǵy 3,3 keli. "Keıbir málimetterge súıensek, qyz ájethananyń ishinde týǵan. Náresteni tórt metrlik shuńqyrdan alyp shyqty", - dedi kýáger. Onyń aıtýynsha, qyz 4 shildede tańǵy saǵat 7-de tabylǵan. "Úıdiń qojaıyny áıeldi kórmepti. Ol tańǵy saǵat 7-de náresteniń jylaǵanyn estip, syrtqa shyqqan. Sodan jedel járdem qyzmetkerlerin shaqyryp, náreste jergilikti aýrýhanaǵa jetkizildi. Keıinnen oqıǵa ornyna polıseıler kelip, qyz oblystyq aýrýhanaǵa jetkizildi", - dedi kýáger.

Oblystyq balalar aýrýhanasy emdeý isi dırektorynyń orynbasary Arman Toıbekovtyń aıtýynsha, náresteniń jaǵdaıy qalypty. "Qyzǵa azdap sýyq tıgen, biraq dene temperatýrasy qalypty. Aýrýhanada taǵy 10 kúndeı em alady", - dedi dáriger.