Qoǵam qaıratkeri, belgili jýrnalıs Sáýle Meshitbaıqyzy qazaq qyz-kelinshekteriniń búgingi ahýalyna alańdap, otandyq baspasózde úlken másele kóterdi. «Kókek ana» kóbeımes úshin, tastandy bala órbimes úshin, qazaq qyzynyń quny arzandamas úshin, otbasy degen kıeli dúnıe shaıqalmas úshin ol kisi búgingi qoǵamǵa qajetti úsh kerekti atady. Qazaqtyń qyzy men ulyn bólek oqytý kerek!
Bul oıyn jýrnalıs elana.kz saıtynda jarıalaǵan, - dep habarlaıdy Qamshy.kz.
«Myń jerden jahandaný jaǵadan aldy degen kúnniń ózinde, osylaı. Apyraı, biz qaıda ketip baramyz, osy? Tastandy balalardyń deni qara kózder, balalar úıindegi qara domalaqtar qanshama? Osynyń sebep-saldaryn izdep, bolashaq analar tárbıesine nege tez arada kirispeımiz?
Meniń kóptiń talqysyna tastaǵym kelgeni — qyzdarymyzdy bólek oqytýǵa kúsh salý. Bul jańalyq emes.
Qany bir, jany bir, dini men tili bir túrik baýyrlarymyzdyń bastamasymen ashylǵan qazaq-túrik lıseıleriniń kóptep ashylýy da qyzdarymyz ben uldarymyzdyń óresin ósireri haq. Óıtkeni az jyldyń ózinde osy lıseıdi bitirgen túlekter bilim parasatymen kópshilikke tanymal. Ádep, ıba jaǵynan da ózderin moıyndatyp úlgerdi.
Jaǵdaıy kelip tursa, urpaq úshin ekinshi áıel alýdy zańdastyrý kerek!
Qaltaly bıliktegi keı azamattar (atyn atap, túsin tústemeı-aq qoıalyq) toqaldaryna úı, mashına t.b. alyp berip, bar jaǵdaıyn jasaǵandaı keıip tanytyp júr.
Al kindiginen órbigen urpaǵyna ata tegin berýge túrli syltaýlar aıtyp qashqaqtaıdy. Bul jas toqaldyń ómirin óksitip, perzentterin tiri jetim etkenmen birdeı emes pe? Eshqandaı dúnıege aıyrbastalmaıtyn ákelik mahabbatty qaıda qoıamyz? Álgindeı erkekter dúnıege kelgen balasyn perzenthanadan alyp shyǵýdan qorqady.
Balaǵa ákeniń nyspysyn berýge, balaǵa bar jaǵdaıdy jasaýǵa erekshe talap qoıylýy kerek. Ony oryndamaǵan jaǵdaıda qyzmetinen qýylyp, qatań jazalar qoldanylsa.
Sheteldikter alatyn qyzdyń qunyn belgileý kerek!
Shetelde oqyǵan qyzdardyń namyssyzdyǵynan «jıenderimiz» álemniń túkpir-túkpirinde kóbeıip keledi. Kúlemiz be, jylaımyz ba? Qazaq qyzdarynyń quny nege sonshalyqty arzandap ketti, aǵaıyn? Mysaly, Mysyrda jat jurttyń qyzyn alatyn bolsa, 100 myń AQSH dollaryn suraıdy. Ózge de elderdiń qyzdary altynnan ardaqty.
Al bizdiń qyzdarymyz tyshqaq laq qurly joq pa? Kim kóringen paıdalanady, eline jetektep alyp kete beredi. Iaǵnı ondaı kúıeý bolǵysy kelgenderge zań júzinde tosqaýyl qoıý qajet. Mysyr, nemese Túrkimenstan sıaqty qymbat baǵa qoıalyq”,-deıdi qoǵam qaıratkeri.
