Astananyń mıllıonshy turǵyny bolyp ómirge kelgen Saıda esimdi sábı Qaznette kóp talqylandy. Osydan keıin jurtshylyq Almatynyń mıllıonynshy turǵyny bolǵan balany eske ala bastady.
Osylaısha Astananyń mıllıonynshy turǵyny Almatynyń mıllıonynshy turǵynyn eske túsirdi. Sonymen ol kim edi?
Baýyrjan Dáýletuly Qadyrsyzov 1981 jyly 19 jeltoqsanda tórtinshi perzenthanada qurylys salasynda eńbek etetin Dáýlet jáne Gúlnázıa Qadyrsyzovtardyń otbasyna dúnıege kelgen. Osynaý qýanyshty sátke baılanysty qazaqtyń dańqty batyry Baýyrjan Momyshuly otbasyna izgi tilegin bildirgen bolatyn:
Almatynyń mıllıonynshy turǵyny bolǵan Baýyrjanǵa qazaqtyń dańqty batyry Baýyrjan Momyshulynyń ózi batasyn bergen.
«Baýyrjan dep atyn qoıǵan sábıge batamdy beremin. Deni saý, naǵyz jigit bolyp óssin. Uly Otanymyzdyń myqty azamaty bolýyna shyn júregimmen tilektespin», – degen edi batyr.
Ómirge kelgen ul balaǵa sol kezde «Almaty qalasynyń mıllıonynshy turǵyny» degen alqa taǵylyp, qalanyń sımvolıkalyq kilti tabys etilgen.
Baýyrjan óziniń mıllıonynshy turǵyn bolǵanynan azdap qysylatyn jigit jurtqa jarıa ete bermeıdi eken.
«Men qarapaıym jigitpin, qarapaıym kún kóremin, eshqandaı syı-qurmetti talap etpeımin. Meni súıikti qalamnyń mıllıonynshy turǵyny retinde emes, osy qalpymmen qabyldaǵandaryn qalaımyn. Al qalanyń kiltine keler bolsaq, ol Almatydaǵy 28 gvardıashy-panfılovshylar mýzeıinde saqtaýly», – deıdi Baýyrjan Qadyrsyzov.
Sondaı-aq, Almatynyń mıllıonshy turǵyny Qonaevqa sahnadan turyp óleń oqıtynyn, ómirinde gazetterge de, telearnalarǵa da kóp suhbat bergenin, túri sharalarǵa qatysqanyn, kóbine ózine batyrdyń esimi berilgendikten Baýyrjan Momyshulymen baılanysty sharalarǵa qatysqanyn eske aldy.
Álibı jáne Álıhan esimdi eki ul tárbıelep otyrǵan Almatynyń mıllıonshy turǵyny Baýyrjan Qadyrsyzov Astananyń mıllıonshy turǵyny bolǵan Saıda esimdi sábıge baqyt tiledi.
-Saıda eń baqytty, sulý ári aqyldy qyz bolǵanyn tileımin. Ol barlyǵyna úlgi bolsyn, óıtkeni ol – elordanyń beınesi. Al qyz bala qashanda meıinbandyqtyń, qamqorlyqtyń úlgisi sanalady, - dedi ol.
