Dárethanaǵa tastalǵan balaǵa talas kúsheıdi. Almaty oblysy Aqshı aýylynda nájis arasynan tabylǵan sábıdi úıdiń ıeleri de, kókek ananyń sheshesi de qaıtaryp alýǵa qulshynyp otyr., - dep habarlaıdy Qamshy.kz KTK arnasyna silteme jasap.

Ázirge quzyrly organdar týystaryna ruqsat bergen joq. Qarlyǵash esimdi sábı bul kúnde balalar aýrýhanasynda. Al naǵashylary bolsa náresteni alǵan boıda aldymen tegin ózgertpek. 

Shýly oqıǵadan Aqshı aýyly túgel habardar. Elde joq árekettiń kýási bolǵan Shansharbekovter áýleti de áli kúnge es jıa almaı otyr. Sol kúni ádettegideı erte turǵan Saqysh áje balany alǵash kórgen sátte qatty abdyraǵanyn aıtady.

Saqysh Shansharbekova, Altynaıdyń naǵashy ájesi:

-Oıbaaı, aıta almaımyn. Qorqynyshty. Denem dirildegende tús aýǵansha ózime ıe bola almadym ǵoı. Dárethanaǵa baraıyn dep shyqqanda  jylap jatqan balanyń daýsyn estidim. Sodan júgirip kep kórshime kirdim de kómek suradym. İshinen balany alyp qaıtadan ornyna qoıyp qoıdym. 

Náreste tabylǵan dárethana ishinde qabyrǵasy opyrylyp, qudaı saqtap, bala sol qurǵaq topyraqtyń ústine túsken eken. Úı ıesi ájethanany buzyp, shaqalaqty satymen alyp shyǵypty. Aıdar qazir bolǵan jaıdy esine alǵysy da kelmeıdi. Ol úshin basty másele – balany qalaıda ózderine qaıtaryp alý.

Aıdar Shansharbekov, Altynaıdyń naǵashy aǵasy:

-Balany alyp qalsaq  deımiz. Ózimizge.  Ájesi de alyp qalǵysy keledi. Endi Allanyń bergen balasy ǵoı.  Endi men oılaımyn, onyń atyn ózgertpeımiz. Qarlyǵash bolyp qala bersin. Endi famılıasy, basqasy ózgeredi.

11 qursaq kóterip, olardan 18 nemere, 2 shóbere súıip otyrǵan Saqysh qarıa kishkentaı Qarlyǵashty asyrap alǵysy keledi. Biraq, sábıge talas kúsheıip tur. Óıtkeni, ony Altynaıdyń sheshesi de baýyryna baspaqshy. Biraq ony endi sot oryndary sheshedi. Al oń bosaǵada otyryp bala tapqan Altynaı esimdi 22 jastaǵy qyz bul úıge jıenshar bop keledi eken. Ol qazir ýaqytsha qamaý ızolátorynda otyr. Jaýapkershilikke qyzdy júkti etken jaýapsyz áke de tartylýy múmkin.