5 maýsym kúngi Aqtóbe oqıǵasyn uıymdastyrdy jáne soǵan qatysy bar degen aıyppen tutqyndalǵan sodyrlar ómir boıyna bas bostandyǵynan aıyrylýy múmkin, - dep habarlaıdy Qamshy.kz "Aktobe Taıms" portalyna silteme jasap.

Bul týraly Aqtóbe oblystyq sotynyń baspasóz qyzmeti aqparat taratqan.

«Tutqyndalǵandardyń jasy – 16 men 29 jas aralyǵy. Qamaýǵa alý sheshimi 8 jáne 14 maýsymda sanksıalandy. Olar ómir boıyna bas bostandyǵynan aıyrylýy múmkin», - dep habarlady sottyń baspasóz qyzmeti.

Eske sala ketsek, 5 maýsymda Aqtóbede 26 adam eki qarý-jaraq dúkenine shabýyldap, ulttyq gvardıanyń áskerı bólimin basyp alýǵa tyrysqan. Shabýyl men atystan resmı málimet boıynsha 7 adam qaza taýyp, 40 shaqty adam jaralanǵan.

Alty kúnge sozylǵan arnaıy operasıada shabýylǵa kúdikti delingen 18 adamnyń kózi joıylyp, birneshe adam ustalǵan.

Qazaqstan prezıdenti Nursultan Nazarbaev shabýyl jasaǵandardyń "radıkaldyq dinı top ókilderi" bolǵanyn jáne olardyń "shetelden nusqaý alǵanyn" málimdegen.