SHQO-da aımaqtyq BAQ basshylary men ákimdik ókilderiniń qatysýymen kezekti aqparattyq keńestiń otyrysy ótti. Keńes barysynda oblys ákiminiń orynbasary Jaqsylyq Omar aýdan ákimdikteri men oblystyq basqarmalarǵa áleýmettik jelilerdegi resmı paraqshalaryn jandandyrýdy tapsyrdy, - dep habarlaıdy Qamshy.kz.

Jıynda oblystyq basqarmalar men aýdandyq ákimdikterdiń áleýmettik jeli men ınternet resýrstardaǵy jumystary qatań synǵa alyndy. Atap aıtar bolsaq, birqatar memlekettik organdar resmı saıt jáne áleýmettik jelidegi paraqshalaryn tek kórsetkish úshin qoldanyp kelgen.   

– Eger áleýmettik jeliden paraqsha ashsańyzdar, oǵan kúndelikti aqparat salyp, júrgizip otyrý qajet. Dál sol sıaqty resmı saıtpen de qarqyndy jumys jasańyzdar. Tek kórsetkish úshin paraqsha ashyp qoıǵan jaramaıdy. Qazir aqparattyq aǵyn zamany bolǵandyqtan, turǵyndardyń kóbi jańalyqty áleýmettik jeliden oqyp, bólisedi, – dedi Jaqsylyq Omar.

Sondaı-aq, aımaq basshysynyń orynbasary aıtyp ótkendeı, atalǵan jumystar júrgizilgen jaǵdaıda, memlekettik organ jáne turǵyndar arasyndaǵy qarym-qatynas nyǵaıa túspek.