Fransıanyń Nıssa qalasyndaǵy terakti kezinde Qazaqstannyń tórt azamaty oqıǵa ornyna jaqyn mańda ornalasqan qonaq úıde bolǵan, olar zardap shekken joq, - dep habarlaıdy Qamshy.kz QR Syrtqy ister mınıstriniń baspasóz hatshysy Ánýar Jaınaqovqa silteme jasap.

«Nıssada bolǵan teraktige baılanysty, Fransıa halqyna kóńil aıtamyz. Aldyn ala málimet boıynsha, qaza tapqandar men zardap shekkender arasynda qazaqstandyqtar joq. Degenmen, terakti bolǵan jerde Qazaqstannyń tórt azamaty júrgen. Túnde QR Syrtqy ister mınıstrligine Qazaqstan azamaty habarlasyp, Nıssa qalasyndaǵy «aǵylshyn jaǵalaýyna» jaqyn jerdegi qonaq úıde otyrǵanyn jáne janynda taǵy úsh adam bar ekenin málim etti. Olar ómirlerine qaýip tónedi dep qoryqqan. Terezeden qaza tapqandardy, qashqan adamdardy kórgen. Bizden kómek surady. Qazaqstannyń dıplomattary shuǵyl túrde olarǵa habarlasty. Qazir tórt azamat ta qaýipsiz jerde. Eshqaısysy zardap shekken joq»,-dedi Á.Jaınaqov.

Onyń aıtýynsha, Nıssada júrgen tórt azamat erli-zaıyptylar otbasy jáne olardyń eki týysqany. Tórteýi de bul elge týrıs retinde barǵan. Qazir olar ózderi toqtaǵan qonaqúıde jatyr.