Ystambuldaǵy jaǵdaı boıynsha telearnalar oqıǵa oryndarynan aqparattar berýde, olardy kóre otyryp bolyp jatqan oqıǵany tolyqqandy baǵalap shyǵý múmkin emes, - deıdi Túrkıada bilim alyp júrgen qazaqstandyq Nurat İlıas.

Ol Ystambul ýnıversıtetinde 3 jyldan beri túrkologıa mamandyǵy boıynsha doktorantýrada oqıdy, - dep habarlaıdy Qamshy.kz QazAqparatqa silteme jasap.

Onyń aıtýynsha, keshegi oqıǵalar bastalǵan kez jergilikti ýaqytpen keshki saǵat 20-21 shamasy. Bastapqyda áýede áskerı ushaqtar men tikushaqtardyń ushýy jıilep ketken. Alaıda ol bul áskerı oqý-jattyǵý shyǵar dep mán bermegen. Túngi 23-ter shamasynda BAQ jańalyqtarynan soń ǵana elde áskerı tóńkeristiń bastalǵany belgili bolǵan.

«Qazir dúrbeleń birshama saıabyrsydy. Úkimetke qoldaý bildirýshiler Túrkıanyń týyn ustap ortalyqtaǵy alańdarǵa attandy, sol jerde jaqtastarymen bılikke qoldaý kórsetýde. Olardyń qatarynda túrkıalyq baıyrǵy turǵyn qazaqtar da bar», - deıdi N.İlıas.

Birqatar aqparat agenttikter osy ýaqytta Túrkıada áleýmettik jelilerdiń jumysy shekteldi dep jarıa etken. Alaıda Ystambulda ınternet jyldamdyǵy tómendegenimen óshpegen, keıin tańǵa qaraı onyń jyldamdyǵy qalpyna kelgen.

Bir-eki saǵat buryn telearnalar jumysy belsendirek bolyp, BAQ oqıǵa oryndarynan aqparattar, beınekórilimder bere bastaǵan. Aqparattyń kóptigi, ári sanalýandyǵy naqty oqıǵany tolyqqandy baǵalaýǵa múmkindik bermeı otyr, deıdi Nurat İlıas.
Ol kórip-bilgenderin Feısbýktegi paraqshasynda jarıalap otyrdy. 

© sýret Nurat İlıastyń paraqshasynan alyndy