"Nur Otan" partıasy tóraǵasynyń birinshi orynbasary Muhtar Qul-Muhammedtiń 2016 jyly 18 shildedegi Almatyda bolǵan qaıǵyly oqıǵaǵa qatysty úndeýi jarıalandy, - dep habarlaıdy Qamshy.kz Tengrinews.kz -ke silteme jasap.
Úndeýde "Nur Otan" partıasy Almatyda terrorısterdiń qolynan qaza tapqan qurbandardyń týǵandary men jaqyndaryna qaıǵylaryna ortaqtasyp, kóńil aıtady. "Memleket basshysy eldi dúrliktirgen qandy oqıǵaǵa oraı Qaýipsizdik keńesiniń shuǵyl otyrysyn ótkizdi. Onda Elbasy Almatyda jáne búkil elimiz boıynsha qaýipsizdikti qamtamasyz etýge qatysty naqty tapsyrmalar berdi. Prezıdent qazirgi tańda "qaýeset taratýshylardyń jolyn kesip, arandatýshylardy anyqtaý mańyzdy" ekenin atap ótti. Partıamyzdyń Tóraǵasy: "Tártipti retke keltirý úshin eń qatań sharalar qabyldanyp jatqanyna halyq senimdi bolýǵa tıis", - dedi. Memleket basshysynyń málimdemesin tolyǵymen qoldaı otyryp, biz adamgershilikten ada osynaý terrorlyq aktini jasaǵan qandyqol qylmyskerler barsha Qazaqstan halqyna qarsy shyqty dep sanaımyz. Terrorıster qatań jazalanýy tıis", - delingen habarda.
Sonymen qatar, Muhtar Qul-Muhammedtiń aıtýynsha, shabýyldaýshylar bizdiń birtutas qoǵamǵa qaýip tóndirip, úreı týǵyzýdy kózdedi. Biraq lańkesterdiń bul áreketterinen túk te shyqqan joq. "Almatydaǵy qaıǵyly oqıǵa qazaqstandyqtardy odan ári biriktire tústi. Birlik, beıbitshilik jáne turaqtylyq - bizdiń elimizdiń basty qundylyqtary. Bul qasıetti uǵymdarǵa eshkimniń syzat túsirýine quqy joq", - deıdi ol.
"Qarapaıym halyqtyń qaýipsizdigi úshin ózderin qurban etken antyna adal polısıa qyzmetkerleri - Qazaqstannyń naǵyz batyrlary. Olardyń erlik áreketteri ójettilik pen erjúrektiliktiń jáne Otany men týǵan halqyna adal qyzmet etýdiń jarqyn úlgisi bolyp qala beredi. Qazaqstan halqy lańkestikke joıqyn toıtarys beredi. Bul qylmyskerlerdiń ózderin musylmanbyz dep ataýǵa esh quqy joq. Óıtkeni, olar adam óltirip, eń aýyr kúnáni arqalady. Olardyń qanquıly áreketteri eshqandaı aqtap alýǵa kelmeıdi jáne ol múmkin de emes. "Nur Otan" partıasy barlyq qazaqstandyqtardy terorızmge qarsy birigýge shaqyrady. Qazaqstan halqy elimizdegi bul qasirettiń tamyryna tek birlik pen birtutastyq arqyly balta shaba alady. Qazirgideı qıyn jaǵdaıda azamattarymyzdyń qaıǵyny bólisip, yntymaq pen tatýlyq tanytýy - sonyń aıqyn dáleli", - delingen úndeýde.
