Elbasynan "bata" alǵan afrıkalyq jigit qazaq qyzyna qalaı ǵashyq bolyp, úılengenin áńgimelep berdi, - dep jazady Qamshy.kz. 

Bilim jáne ǵylym mınıstrliginiń ıýtýb kanalyna suhbat bergen Danıel Djeıms Qazaqstan halqy Assambleıasy keńesiniń «Táýelsizdik. Kelisim. Bolashaǵy birtutas ult» atty XXIV sesıasynda Elbasy Nursultan Nazarbaevtyń aldynda qazaq tilinde án shyrqap bergen edi.

Esterińizde bolsa, Elbasy sol keńeste Danıelge "Nıgerıadan kelip, Qazaqstanda qalyp qoıǵan azamat bizde áli bolǵan emes. Sondyqtan sen tamyryńdy osynda jaı" dep "batasyn" bergen-di. 

Sol "qara" bala Danıel Djeıms qazaq qyzyna qalaı ǵashyq bolǵanyn, úılenerde qaıyn atasy qarsy bolǵanyn aıta kele "qazaq tilin úırenýine mahabbat áser etti", dese, "qaıyn atasynyń ruqsat berýine qazaq tilin bilýim áser etti" deıdi.

 Danıel Djeıms 1991 jyly Nıgerıadaǵy Lagos qalasynda dúnıege kelgen.

Búginde Almatydaǵy Afrıkalyq jastar qoǵamynyń prezıdenti bolyp otyrǵan Danıel Djeımstiń anasy orys ultynan. 

"Men ózim aralas otbasynda tárbıelengendikten, mundaıǵa mán bermeımin. Men appaq qazaq qyzyna ǵashyq boldym. Jáne aq kóńilimmen onymen birge bolǵym keldi" degen Danıel kelinshegi Aıdanamen Almatynyń Arbatynda tanysypty.

Qazaqstanda turyp jatqanyna bes jyl bolǵan Danıel kásibı mýzykant. T.Júrgenov atyndaǵy óner akademıasynyń túlegi. Fortepıano men dombyranyń qulaǵynda oınaıtyn "qara" jigit búginde qazaq qyzy ekeýi Adel esimdi bir uldy tárıbelep otyr.

"Meniń aǵylshyn tilinde tanyspaq bolǵanyma, ol qazaqsha jaýap berdi. Meniń mahabbatym qazaq tilin úırenýime sebep boldy" degen Danıel qazaq qyzy Aıdanaǵa qalaı ǵashyq bolǵanyn aýyzynyń sýy quryp áńgimelep berdi. 

Ózge ulttardyń sol eldiń qyzyna qalaı qumar ekenin qushtarlyqpen aıtatyn "dástúr" bizdiń elde ǵana bar sıaqty ma, qalaı?