Qamshy.kz portalynda «Saǵadıevter áýletinen qaryzymyzdy suraımyz!» taqyrybymen Maqsat Jaqaý esimdi azamattyń haty jarıalanǵan bolatyn. Onda hat ıesi İlıas Saǵadıev esimdi azamattyń bir jylǵa jýyq ýaqyttan beri Jaqaýovtar áýletiniń birneshe adamnynan qomaqty qarajat alyp, qaıtarmaı júrgeni baıandalady.
Osy hatqa baılanysty QR Bilim jáne ǵylym mınıstrligi baspasóz qyzmetinen jaýap hat keldi. Onda qaryz aldy delingen azamattyń Saǵadıevter otbasyna qatysy joqtyǵy aıtylǵan. Dálirek aıtsaq, Bilim jáne ǵylym mınıstrliginen kelgen jaýap hatta:
«Qamshy.kz portalynyń 2016 jylǵy 25 shilde kúngi «Saǵadıevter áýletinen qaryzymyzdy suraımyz!» atty maqalasynda İlıas Rysbekuly Saǵadıev degen azamatty qalyń jurtshylyqqa belgili ǵylym qaıratkeri, akademık Kenjeǵalı Ábenuly Saǵadıevtiń týysy retinde atap kórsetti. Maqala jarıalana salysymen, bul aqparattyń dáıeksiz ekendigi anyqtaldy: Jaqaýovtar otbasy atynan Feısbýk áleýmettik jelisinde taratylǵan aqparatta olardan qomaqty somadaǵy qarjy alyp, túrli sebep-syltaýlarmen birneshe aı boıy qaryzyn qaıtarmaı júr degen aıyp taǵylyp otyrǵan İlıas Saǵadıevtiń akademık Saǵadıevtiń áýletine týystyq jáne basqa eshqandaı da qatysy joqtyǵy anyqtaldy», - delingen.
Sondaı-aq, M. Jaqaý hatynda «keltirilgen aqparat birneshe azamattyń, onyń ishinde elge tanymal ǵalym men memlekettik organnyń laýazymdy tulǵasynyń abyroılaryna, qadir-qasıetterine jáne iskerlik bedelderine nuqsan keltiretindikten, Kenjeǵalı Ábenuly Saǵadıev pen onyń áýleti múshelerinen keshirim ótine otyryp, keltirilgen jalǵan derekterdi teriske shyǵarý» suralǵan.
Portal redaksıasy M. Jaqaýdyń hatyn jarıalaǵanda redaksıanyń eshqandaı taraptyń múddesin kózdemeıtinin, daýly máselede beıtaraptylyq tanytatynyn, hat avtorynyń pikiri redaksıanyń kózqarasyn bildirmeıtinin eskertken. Redaksıanyń ol ustanymy ózgergen joq. Aldaǵy ýaqytta daýly máseleniń anyq-qanyǵyna jetý úshin taraptardyń pikiri men túsinikterine saıt betinen oryn berýge, týyndaǵan daýdyń oń sheshim tabýyna nıetti ekenin taǵy bir eskertemiz. Iaǵnı, Qamshy.kz M. Jaqaý hatynda aıtylǵan jáıtterdiń mazmunyna jaýap bermeıdi.
Soǵan qaramastan, portal ujymy osy daýdyń ary qaraıǵy barysyn baqylaýǵa alý quqyǵyn ózine qaldyra otyryp, portaldyń Saǵadıevter áýletiniń abyroıy men jekelegen tulǵalardyń iskerlik bedeline nuqsan keltirýdi maqsat tutpaıtynynyń belgisi retinde M. Jaqaýdyń joǵaryda aıtylǵan hatyn saıttan alyp tastaý týraly uıǵarymǵa keldi. Qamshy.kz portalyndaǵy jarıalanymǵa baılanysty qandaı da bir qolaısyzdyqtar týǵan bolsa, tanymal áýlet múshelerinen keshirim suraımyz. Aldaǵy ýaqytta osy materıaldyń jaryq kórýine sebep bolǵan hat avtory M. Jaqaý da óz oıyn bildirip, qalyń oqyrmanǵa túsinik beredi degen senimdemiz.
Qurmetpen, Qamshy.kz portalynyń redaksıasy
Portaldyń ár jarıalanymyn jiti qadaǵalap otyratyn janashyr oqyrmandar nazaryna Bilim jáne ǵylym mınıstrligi Baspasóz qyzmetinen kelgen hat mátinin de esh ózgerissiz usynýdy jón kórdik:
«Qamshy.kz» portalynyń 2016 jylǵy 25 shilde kúngi «Saǵadıevter áýletinen qaryzymyzdy suraımyz!» atty maqalasynda İlıas Rysbekuly Saǵadıev degen azamatty qalyń jurtshylyqqa belgili ǵylym qaıratkeri, akademık Kenjeǵalı Ábenuly Saǵadıevtiń týysy retinde atap kórsetti.
Maqala jarıalana salysymen, bul aqparattyń dáıeksiz ekendigi anyqtaldy: Jaqaýovtar otbasy atynan Feısbýk áleýmettik jelisinde taratylǵan aqparatta olardan qomaqty somadaǵy qarjy alyp, túrli sebep-syltaýlarmen birneshe aı boıy qaryzyn qaıtarmaı júr degen aıyp taǵylyp otyrǵan İlıas Saǵadıevtiń akademık Saǵadıevtiń áýletine týystyq jáne basqa eshqandaı da qatysy joqtyǵy anyqtaldy.
Zań talaptaryna sáıkes, «Qamshy.kz» redaksıasyna dáıeksiz jalǵan aqparattyń áshkerelenýi jóninde talap qoıylyp otyr. Osyǵan baılanysty redaksıa kelesini habarlaıdy: «Saǵadıevter áýletinen qaryzymyzdy suraımyz!» atty maqalada akademık Kenjeǵalı Saǵadıev pen onyń áýletine qatysty málimetter shyndyqqa sáıkes kelmegendikten, sondaı-aq onda keltirilgen aqparat birneshe azamattyń, onyń ishinde elge tanymal ǵalym men memlekettik organnyń laýazymdy tulǵasynyń abyroılaryna, qadir-qasıetterine jáne iskerlik bedelderine nuqsan keltiretindikten, Kenjeǵalı Ábenuly Saǵadıev pen onyń áýleti múshelerinen keshirim ótine otyryp, keltirilgen jalǵan derekterdi teriske shyǵarady.
