“Kerek.info” gazetiniń redaksıasyna habarlasqan aqtóbelik, qyzyn oramal taqqany úshin mektepke jumysqa almaı otyrǵandyǵyn aıtty. “Oramalyńdy sheshseń ǵana jumysqa alamyz” degen mektep dırektory keıin bos orynnyń joqtyǵyn aıtyp, jas mamandy jumysqa alýdan bas tartqan. 

Altyngúl Sársenova bıyl Q.Jubanov atyndaǵy ýnıversıtetti aıaqtap, bastaýysh synyp muǵalimi mamandyǵy dıplomyn alǵan. Ol joldamamen qaladaǵy mektepterdiń birine jiberiledi. Biraq mektep dırektory jas mamanǵa “oramalyńdy sheshseń ǵana jumysqa alamyz” degen shart qoıady. 

- Bul jerde adam quqyǵy taptalyp otyr. Qyzym joldamany sáýir aıynda aldy. Sol joldamamen mektepke barǵanda dırektor oramalyn sheshýdi talap etken. Kóp oılanyp, mektep dırektorynyń aldyna ekinshi ret barǵan qyzym oramaldy qarapaıym túrde taǵyp júretindigin aıtqan. Eshqandaı nátıje bolmady. Qolyna dıplomyn alyp, qaıta barǵanymyzda mektep basshysy bos orynnyń joq ekendigin aıtty. Oramal taqqandardyń bári birdeı qaýipti emes qoı. Men kúzetshi bolyp jumys isteımin. Balalarymdy aqyly bólimde oqyttym. Qatarynan qalmasyn, bilim alsyn dep. Joǵary bilimi bolsa da, jumysqa ornalasa almaı júr. Prokýratýraǵa da aryz jazdym, - deıdi Altyngúldiń ákesi Arystanbek Sársenov. 

Oramaldy úsh jyl buryn, ýnıversıtet qabyrǵasynda júrip taqqan Altyngúl, mektepte talap etilgen kıim úlgisin kıýge daıyn ekendigin aıtty. Tek oramal taǵýǵa ruqsat etse deıdi. 

-Basqa jeke uıymdardan da jumys izdep júrmin. Biraq muǵalim bolǵym keledi, - deıdi jas maman.

Bul máselege baılanysty jaýap bergen qalalyq bilim bóliminiń basshysy Lázzat Orazbaeva, bos oryn bolsa, zańdy túrde baryp turǵan mamannan dırektordyń bas tartýǵa quqyǵy joq ekenin jetkizdi. 

Bet qattalyp jatqanda, qalalyq bilim bólimi Altyngúl Sársenovanyń №22 orta mektepke jumysqa ornalasqanyn habarlady. Ol orys mektebiniń bastaýysh synybyna sabaq beretin bolady. Al jumysqa alý týraly buıryq 1 qyrkúıekte shyqpaq.