«Islam memleketi» lańkestik uıymynyń qataryna engen qazaqstandyq 26 jastaǵy áıel kómek surap, Daǵystandaǵy kelisim ortalyǵyna ótinishpen shyqqan, - dep habarlaıdy Qamshy.kz SkifNews.kz - ke silteme jasap.
Ol reseılik arnaıy jasaq ókilderine habar berip, ózin quldyqtan bosatýyn surapty. Bul týraly Life.ru portaly habarlap otyr.
Lańkesterdiń tutqynyna túsken jas áıeldiń anasy Roza Sabyrovanyń aıtýynsha, Qazaqstan bıligi men elshilik ótinishke qulaq aspaı, qoldaryn bir siltegen kórinedi.
«Olar qyzdyń sýretin barlyq jerge taratty. Shekaraǵa kele qalsa ony dereý Qazaqstanǵa deportasıalaımyz deıdi. Biraq, ol qalaı shekaraǵa deıin keledi, eger ony tutqynda ustap otyrsa? Eger ol óz erkimen shyǵyp kete alatyn bolsa áńgime basqa. Onyń emizýli eki balasy bar qolynda», - deıdi anasy Roza Sabyrova.
Áıeldiń aıtýynsha, qyzy 2013 jyly qurbylarymen Túrkıaǵa ketken eken. Arada biraz ýaqyt ótken soń ol telefonmen habarlasyp, kúıeýge shyqqanyn jáne Sırıada turyp jatqanyn aıtqan. Sol elde júrip eki bala týyp alypty. Sábıleri dúnıege kelgennen beri qyzymnan maza ketti deıdi áıel. Anasymen bolǵan áńgime barysynda ol «ózimdi shahıd, balalarymdy quldyqqa salýy múmkin» dep dabyl qaqqan eken.
«Ol balasyn bosanǵannan bastap kómek suraı bastady. Onyń SMS-habarlamalaryn túgel aıtyp bere almaımyn, jan túrshigedi. "Mama, keshirshi. Áke, keshirshi. Meni myna jerden alyp ketińizdershi, aıaqtaryńyzdy súıip óteıin. Men balalarym úshin qatty alańdaımyn. Bizge qaýip tónip tur. Munda balalary bar orystildi áıelder kóp, barlyǵy ketkisi keledi, biraq, bizdi jibermeıdi" dep jazady bir habarlamasynda. Mundaı SMS-habarlamalar jıi kelip turdy. Ómirimiz tozaqqa aınalǵandaı. Qolymyzdan túk kelmeıdi. Bosanǵannan keıin biraz qan joǵaltqan. Onyń ústine, eki balasy da emizýli. Qalaı qashyp keterin bilmeı otyr», - deıdi Roza.
Qazaqstan bıliginen qoldaý tappaǵan Roza Sabyrova Daǵystandaǵy kelisim ortalyǵynan kómek surapty. Atalǵan uıym dál osyndaı problemaǵa tap bolǵan kóptegen otbasyǵa kómektesken. Ondaǵylar reseılik kúshtik qurylymdarǵa habar bergenin aıtyp otyr.
Al, QR Syrtqy ister mınıstrligine arnaıy suraqpen shyqqan Today.kz portalyna vedomstvo ókilderi Roza Sabyrovanyń, ne onyń qyzynyń ótinishpen kelmegenin aıtypty.
