Qara oramalmen betin jaýyp, azyq-túlik dúkeninen shyqqan kelinshek óz ómiri týraly aıtyp berýden bas tartqan joq. Tek jeke basyna qatysty jaıttardy jarıalamaýdy ótindi, - dep jazady Nur.kz.
«Men pák din ıslam týraly, namaz týraly eshteńe aıtqym kelmeıdi. Ol týraly aıtýǵa haqym da joq. Tek men ózimniń qalaı namazhan bolǵan kezimdi aıtyp bereıin. 2008 jyly qalada uzyn kóılek kıgen qyzdar kóbeıip ketti. Olarǵa qyzyǵyp ta, jek kórip te qaramadym. Tek jas qyzdardyń oramal taqqanyna tań qalatyn edim. Bir kúni ózim de sondaı bolamyn degen oı kelgen emes. Kafede bir jigitpen tanystym. Ol jigitpen sóılesip júrdik, unap qaldy. Sózi túzý, ıman júzdi bolyp kórindi. Bir jyldaı aralasqannan keıin «áıelim bolshy» dep usynys jasady. Ol kez meniń eń baqytty shaǵym edi, qatty qýandym. Múmkin essiz sezimdi basymnan keshirgen shyǵarmyn. Biraq jigit maǵan oranyp júrýge shart qoıdy. Men kıinsem, basyma oramal taqsam ǵana ózine áıel ete alatynyn aıtty. Qorqynysh, qobaljýdyń barlyǵyn oǵan degen sezimim basty», - deıdi Aıdana.
Ótken ómiri týraly aıtyp bergen kelinshek bir adamǵa eki ret ret turmysqa shyqqan.
«Bir kúnde uzyn kóılek te kıdim, oramal da taqtym. Apyr-topyr toı boldy. Alǵashynda onyń ata-anasymen turdyq. Onyń úıinde namaz oqıtyn adam joq. Olar basynda meniń oramal taǵyp, jamylyp kelgenimdi jaqtyrmaı júrdi. Keıin jaqsy aralasyp ketti. Joldasym týystarymen sóılesip, meniń ımanymnyń álsirep ketkenin aıtty da, páterge shyǵyp kettik. Ol meniń musylman qyzdarmen kóbirek aralasýymdy qalady. Onymen qonaqqa erip barǵan kezde qara nıkab kıgen qyzdy alǵash ret kórdim. Joldasymnyń turaqty jumysy bolǵan joq bal, tmın satyp júrdi. Bir kúni dúkennen kelgenimde joldasym «sóılesýimiz kerek» dep bólmege shaqyrdy. «Men saǵan ruqsatsyz dúkenge barǵanyń úshin talaq aıtyp edim. Bul seniń úshinshi talaǵyń, sondyqtan ajyrasýymyz kerek», - dep qarap tur. Boıym muzdap ketti. Tek jylaı berdim, sebebi meniń aıaǵym aýyr bolatyn. Birge turǵanymyzǵa tórt aıdaı ýaqyt boldy», - deıdi ol.
Aıdanaǵa joldasy talaq aıtqannan keıin alty aı boıy bir-birimen jaqyndaspaı, sol úıde turý kerektigin aıtqan.
«Kóndim, ashýy basylyp, ajyraspaıtyn shyǵarmyz dep oıladym. Sebebi alty aı turǵannan keıin bosanatyn ýaqyt ta jaqyndap qaldy. Biraq «sen ketýiń kerek» dep alty aıdan keıin meni úıime aparyp tastady. Tek jylaı berdim. Burynǵy joldasym menimen ajyrasqannan keıin bir aptanyń ishinde basqa áıelge úılengen. Sol kezde eńsemdi bireý aıaǵymen ezip jatqandaı kúı keshtim. İshimdegi «bala kimge kerek, men ne istep júrmin» dep jylaı berdim. Sol kezde erterek bosanyp qaldym. Shyǵaryp alýǵa joldasym ekinshi áıelin alyp keldi. Menen keıin úılengenin sol kezde aıtty. Meniń týystarym kúıeýime urysyp, qýyp jiberdi. Osylaısha, kúıeýge shyqqanymmen bala týǵan kezde jalǵyzbasty ana atandym. Onyń qanshalyqty qıyn ekenin sezingen adam ǵana biledi», - deıdi Aıdana.
Ol balasyn jastan asqansha ózi tárbıelegen. Burynǵy joldasy aı saıyn kelip, balasyna qajetti zattardy alyp berip otyrǵan.
"Bir kúni balasyna kelgende ol maǵan «qaıta qosylaıyq» dep qarap tur. Sasqanymnan «seniń áıeliń bar emes pe» deı berippin. "Onymen ajyrasyp kettim. Bizdiń aramyzda balamyz bar, qaıta qosylǵanymyz durys bolady. Tek sen menimen qosylý úshin basqa adammen nekelesýiń kerek. Sonda ǵana biz birge bola alamyz", - degende tóbemnen jaı túskendeı boldy. Onyń aıtqan usynysyna basynda shoshyp qarap, janyma jolatpaǵanymmen, túbinde solaı jasadym. Ózi tanystyryp, meni bireýge kúıeýge shyǵardy. Kúıeýime qaıta qosylýdy armandap júrdim, alǵashqy adamym bolǵan soń oǵan degen sezimim basqasha boldy. Ol adammen alty aı birge turyp, kúıeýimmen qaıta qosyldym. Biraq sezimimiz basylyp qalǵan. Ol maǵan birtúrli qaraıdy. "Birdeńe bolsa ol sıaqty emespin be, unamaı jatyr ma?", - dep tıisip shaǵa keledi. Ne kerek «sen taǵy úsh ret talaq aldyń» dep meni qaıta úıime aparyp tastady," -deıdi kelinshek.
Aıdana úıindegilerden qorlanǵanynan páterge shyǵyp ketken. Eki jyldan beri musylman qyzdarmen birge páter jaldap turatynyn aıtady.
«Talaq» degen sózdi estigen saıyn janym shanshylyp, eńsem eziledi. Ár ahıǵa áıel bolyp, hıdjab kıgen kóbelekke aınalǵanymdy oılasam, denemnen jıirkenemin. Biraq ıslam jalǵyz qalýdy quptamaıdy. Kóptegen baýyrlar ózderine áıel bolýymdy surady. Qamqorlyqtaryna alatynyn aıtady. Qazir saýdada júrgen bir baýyrym usynys aıtty. Eki áıeli bar, olarmen de kezdestim. Endi sol kisiniń otbasyn keńeıtemin be degen nıetim bar. Sol kisiniń qalaýymen qazir kıimim de ózgerdi», - dedi Aıdana.
