Astanada túrmeden shyqqan jáne probasıa qyzmetiniń esebinde turǵan azamattardy áleýmettik ońaltýdyń keshendi strategıasy tanystyryldy. QR İshki ister mınıstrliginiń Qylmystyq atqarý júıesi komıteti tóraǵasynyń orynbasary Meıram Aıýbaevtyń aıtýynsha, strategıa aıasynda sottalǵandardy ómirge barynsha beıimdeý kózdelip otyr. Ol úshin jaýapqa tartylǵan adamdy áleýmettik ońaltý jumysyn sotqa deıin bastap, túrmeden keıingi ýaqytta ómirge tolyǵymen beıimdelip ketpeıinshe júrgizý qarastyrylǵan. Tipti, ǵalamtor men uıaly telefon paıdalanýǵa ruqsat berýi múmkin. Sondaı-aq halyqtyń osy sanattaǵy azamattarǵa degen kózqarasyn ózgertý sharalaryna basymdyq berý qarastyrylǵan. Atalǵan strategıany áli qabyldaǵan joq. Ázirshe, ony talqylaýǵa shyǵaryp otyr, - dep habarlaıdy Qamshy.kz Baq.kz tilshisi.
Strategıa jobasyna sáıkes, sottalǵandardy áleýmettik ońaltý jumysyn úsh kezeń boıynsha iske asyrý josparlanǵan. Birinshi kezeńge sáıkes, sotqa deıingi tergeý amaldary barysynda ol adamnyń áleýmettik portreti jasalady. Sonyń negizinde túzeý mekemesi tańdalady. Ekinshi kezeń túrme qyzmetkerleriniń tárbıe jumystarymen jalǵasýy tıis.
«Túrmede bilim alý úshin barlyq jaǵdaılardy jasaý qajet. Sosyn ondaǵy talaptar kádimgideı eńbek naryǵynyń talaptaryna saı bolǵany durys. Adamnyń oılaý qabiletin damytyp, dittegen maqsatty sheshýge degen yntasyn ushtaǵan jón. Bilim berýdi dástúrli túrde ǵana emes, qashyqtan oqytý negizinde de júrgizý kerek. Túrme ákimshiligi bolsa, jumyspen qamtý máselesin jiti baqylaýda ustaýy tıis. Al otbasy, týǵan-týystar men dostar sıaqty áleýmettik baılanystardy úzbeý kerek. Qazirgi aqparattyq tehnlogıalardy paıdalanyp, ol baılanystardy túrmege qamalǵan ýaqyttan bastap, shyqqanǵa deıin saqtap otyrýǵa bolady. Máselen, Skaıp, ǵalamtor, uıaly telefon jáne taǵy basqa baılanys quraldaryn paıdalanýǵa bolady. Biraq onyń barlyǵyn yntalandyrý sharasy retinde paıdalanǵan durys», - deıdi M.Aıýbaev.
Onyń sózine qaraǵanda, Skaıp arqyly túrmede otyrǵan adam búkil otbasy múshelerimen suhbattasa alady. Atalǵan bastamanyń taǵy bir artyqshylyǵy, sottalǵan azamattardyń týǵan-týystary ary-beri júrip, jol shyǵyndaryn shyǵarmaıdy. Ǵalamtor arqyly barlyǵy birdeı jazasyn ótep júrgen adammen sóılese alady. Osy bastama qoldaý tapsa, qylmystyq atqarý júıesine arnaıy tehnıkalyq quraldaryn satyp alýǵa týra keledi. Sonyń barlyǵy búdjettiń esebinen óteledi.
Al strategıanyń úshinshi kezeńi barysynda túrmeden shyqqan jáne probasıa qyzmetiniń esebinde turǵan azamattardy áleýmettik ońaltý sharalary qarastyrylǵan. Oǵan jergilikti bılik organdary men qoǵamyq uıymdar belsene atsalysýy qajet.
QR İshki ister mınıstrliginiń Qylmystyq atqarý júıesi komıteti tóraǵasynyń orynbasary Meıram Aıýbaevtyń aıtýynsha, qazirdiń ózinde túrmege túsken azamatty ómirge barynsha beıimdeý sharalary atqarylyp keledi. Psıholog mamandar sottalǵan adamdarmen tyǵyz jumys jasaıdy. Bilim berý sharalar da joq emes. Atap aıtqanda, búginde qylmystyq atqarý júıesinde 57 jalpy bilim beretin mektepter bar. Ol jerde jyl saıyn shamamen 3,5 adam bilim alady. Budan bólek, 47 kásibı kolej jumys isteıdi. Onda dánekerleýshi, aǵash ustasy, sylaqshy jáne taǵy basqa mamandyqtar boıynsha 3,5 myń adam oqyp jatyr. Jalpy, Qazaqstan túrmelerinde 40 myńǵa jýyq adam jaza ótep júr. Degenmen, atalǵan mehanızm arqyly barlyq maqsat-mindetterge jetý múmkin bolmaı otyr. Sol sebepti túrmeden shyqqan azamattardy áleýmettik ońaltý boıynsha keshendi strategıany ázirleý jumysy qolǵa alyndy.
