Sýret Azattyq saıtynan alyndy
QR UEM Tabıǵı monopolıalardy retteý jáne básekelestikti qorǵaý komıtetiniń tóraǵasy Serik Jumanǵarın 2017 jylǵy 1 qańtardan bastap EAEO sheńberinde teń jaǵdaılar jasaý úshin birqatar salalarda baǵa retteý joıylatynyn málimdedi, - dep habarlaıdy Qamshy.kz Baq.kz-ke silteme jasap.
«Qazirgi kezde Qazaqstannyń maqsaty – básekelestik máselelerinde Ekonomıkalyq yntymaqtastyq jáne damý uıymynyń (EYDU) prınsıpteri men standarttaryna sáıkes kelý, al bul elimizdiń taýar naryqtarynda básekelestik úshin asa jetildirilgen jaǵdaılar jasaýdy bildiredi», — dedi S. Jumanǵarın.
«Birinshi kezeńde 2015 jyly monopolıaǵa qarsy organ jumysynyń tujyrymdamasyn ózgertý jóninde zańnamaǵa kólemdi túzetýler engizildi. Osy jumys sheńberinde Kásipkerlik kodeksine «Básekelestik týraly» Zań ımplementasıalandy, sondaı-aq birqatar jańa ózgerister men tolyqtyrýlar engizildi. Monopolıaǵa qarsy organnyń jańa tujyrymdamasy – kásipkerge aıyppul salý emes, básekelestik zańnamasyn buzýshylyqtardyń eleýli saldarlary týraly habarlaý jáne eskertý ekenin túsiný mańyzdy», — dedi komıtet tóraǵasy.
Onyń aıtýynsha, jumystyń eki jyldyq sıklynyń basty qorytyndylarynyń biri memlekettik baǵa retteýden naryqtyq baǵa belgileýge ótý bolady.
«Osy maqsatta domınanttar Tizilimi 900-den 254 naryq sýbektisine deıin qysqardy jáne ony temir jol kóligi, elektr jáne jylý energetıkasy, munaı ónimderin óndirý, munaıdy tasymaldaý, azamattyq avıasıa, port qyzmeti, telekomýnıkasıalar jáne poshta baılanysy, sondaı-aq gaz salasyndaǵy retteletin naryq sýbektilerine qatysty ǵana júrgizý boljanady. 2017 jylǵy 1 qańtardan bastap osy naryqtarda baǵa retteý joıylady. Baǵa retteýdi joıý EAEO sheńberinde teń jaǵdaılar jasaý sharasy retinde engizildi», — dep habarlady komıtet basshysy.
Baǵa retteýdi joıý kórsetiletin qyzmetterge baǵanyń negizsiz kóterilýiniń belgili bir táýekelin týdyrýy múmkin bolǵandyqtan, 2020 jylǵa deıin azamattyq avıasıa, temirjol kóligi, elektr energetıkasy, gazben jabdyqtaý salalaryndaǵy qoǵamdyq mańyzdy naryqtarda baǵa retteýdiń jańa túrin engizý kózdelýde.
QR UEM-de túsindirgendeı, retteý júıesin reformalaý baǵa retteýden monopolıaǵa qarsy retteýge ótý jolymen bolady (bul monopolıalyq joǵary baǵalardy belgileýmen baılanysty buzýshylyqtardyń jolyn kesý, karteldermen kúresti kúsheıtý, satylas kelisimderdiń jolyn kesý jáne basqalary).
