Qaryz alýshynyń nesıeni óteı almaýy keshirimge negiz bolýy tıis. Bul týraly búgin QR Parlamenti Májilisiniń «Kolektorlyq qyzmet týraly» zań jobasy boıynsha jumys tobynyń otyrysynan keıin tilshilerge bergen suhbatynda QR Ulttyq banki tóraǵasynyń orynbasary Oleg Smolákov málim etti, - dep habarlaıdy Qamshy.kz QazAqparatqa silteme jasap.
«Bir jaǵynan biz bilemiz, nesıe alýshylarda atalmysh kredıtti tolyq atqarýǵa kedergi keltiretin ómirlik jaǵdaıattar bolady. Bul jaǵdaılar nesıe zaımdaryn qaıta qaraýǵa jáne ony talap etýge negiz bola almaıdy. Bul kerisinshe, keshirimge negiz bola alady. Atalmysh zaımdy óteýge jaǵdaıy bolmasa, bank kolektorlyq uıymdy tartpaı-aq, atalmysh zaımdy nesıe alýshydan qaıtarýdy talap etý quqyǵynan bas tarta alady», - dedi O.Smolákov.
Onyń sózine qaraǵanda, Ulttyq bank depýtattardyń nesıe alýshynyń ómirlik jaǵdaıyna baılanysty nesıeni óteý qabiletinen aıyrylǵanda kolektorlyq qyzmetti tartpaý týraly usynystaryn qoldaıdy. Ulttyq bank basshysynyń orynbasary sonymen qatar, qarapaıym halyq kolektorlyq uıymdardy «reket» retinde qabyldaıtyndyqtaryn jasyrmady. Óz kezeginde olar halyqtyń áleýmettik az qorǵalǵan bólikterimen jumys jasaıtyn qyzmet. Osy sebepti atalmysh zań kolektorlyq qyzmettiń jumysyn zań júzinde retteýge jáne halyqtyń kolektorlyq uıymdarǵa degen kózqarasyn ózgertýge septigin tıgizedi.
Májilismender zań jobasynyń 4-babyna ózgerister engizdi. Ol bapta kolektorlyq qyzmet aıasy taralmaıtyn jeke tulǵalar tizimi berilgen. Atap aıtqanda: qaryzdary jalǵyz úılerimen kepildendirilgen tulǵalar, Uly Otan soǵysynyń qatysýshylary men múgedekteri, oǵan teńestirilgen tulǵalar, birinshi jáne ekinshi top múgedekteri, kámelettik jasqa tolmaǵandar, zeınetkerler, sotpen áreket qabilettiligi joq nemese tómen dep tanylǵan tulǵalar, psıhonevrolgıalyq jáne narkologıalyq dıspanserde esepte turǵan tulǵalar, týberkýlez dıspanserinde emdelip júrgen tulǵalar, kásibı jaraqattary bar jáne eńbek mindetterin atqarý kezinde jaraqat alǵan tulǵalar nemese jalpy eńbek qabilettiligin 80-nen 100 paıyzǵa deıin tómendetken QR Úkimetimen bekitilgen keıbir aýyr sozylmaly aýrýlarǵa shaldyqqan tulǵalar, bas bostandyǵynan aıyrý oryndarynda jazasyn ótep jatqan tulǵalar, ekologıalyq apat, tabıǵı jáne tehnogendi sıpattaǵy tótenshe jaǵdaılar kezinde baspanasynan aıyrylǵan tulǵalar, memlekettik jáne qoǵamdyq mindetterin óteý kezinde, áskerı qyzmet babynda, ǵaryshqa ushyrylý kezinde, adam ómirin qutqarý barysynda, qoǵamdyq tártipti saqtaý kezinde qaza tapqan tulǵalardyń otbasylary.
