Qazaqstan zańnamasynda «halal» termınine qatysty túsinik te, anyqtama da joq. Sondyqtan ol zańnamalyq turǵyda bekitilýi shart, dep esepteıdi QR Tutynýshylar quqyǵyn qorǵaý agenttiginiń tóraǵasy Bolatbek Qýandyqov.

«Bizdiń normatıvtik-quqyqtyq bazada «halal» termınine qatysty túsinik te, anyqtama da joq. Zańnamada múldem joq. Degenmen, dinı qoǵamdyq uıymmen qabyldanǵan halal ónimin óndirý jáne satý týraly ereje bar. Sonyń negizinde sertıfıkattar berilýde. Ol zańnamalyq turǵyda bekitilmegendikten, ol boıynsha memlekettik normatıvtik-quqyqtyq aktiler bolmaǵandyqtan, agenttik QR Bas prokýratýrasyna halal ónimi degen uǵymǵa quqyqtyq baǵa berýge qatysty saýal tastadyq. Indýstrıa jáne jańa tehnologıalar mınıstrligine, Din isteri agenttigine hat joldadyq. Munda naqty belgilengen sharttar bolý kerek dep esepteımiz. Ol zańnamalyq turǵyda bekitilip, halal krıterııleri naqty kórsetilýi shart, sodan keıin naryqqa shyǵarylýy tıis», - dedi ol búgin Astanada QR Prezıdenti janyndaǵy Ortalyq komýnıkasıalar qyzmetinde ótken brıfıńte.

Onyń aıtýynsha, Qazaqstanda halal degen túsinik zańdyq turǵyda negizdelmegendikten, tutynýshy sotta óz quqyqtaryn qorǵaı almaýy yqtımal.

«Eshkim halal ne ekenin túsinbeıdi. Sot onyń halal nemese halal emes ekendigine qatysty sheshim shyǵara almaıdy. Sondyqtan barlyǵy quqyqtyq aıanyń ishinde bolýy kerek. Ol erteń tutynýshy qorǵalýy úshin qajet. Qazirgi ýaqytta «halal» shujyqtar kóptep shyǵyp jatyr. Ony qoıshy, búginde «halal» qonaqúıler paıda bolǵan. Jaqynda ınternetten oqydym, alys shetelden kelgen meıman Qazaqstanda «halal» kólik jóndeý stansasyn kórgende tańǵalypty. Mundaı aljasýlar bolmas úshin, zańǵa engizýimiz shart», - deıdi ol.

inform.kz