Atyraý oblysy Qyzylqoǵa aýdanyndaǵy sharýa qojalyqtarynyń birinde qoılar jappaı qyrylýda,-dep habarlaıdy Qamshy.kz QazAqparatqa silteme jasap. 

Aldyn ala dıagnoz boıynsha, mal ólimine pasterellez sebep.

«Qyzylqoǵa aýdany Jasqaırat aýyldyq okrýgindegi usaq maldyń keseli týraly alǵashqy fakti Atyraý oblysynyń veterınarıa basqarmasyna 13 qyrkúıek kúni kelip tústi. Qyrylǵan maldan bıologıalyq úlgiler alynyp, zerthanaǵa jóneltildi. Aldyn ala qoıylyp otyrǵan dıagnoz - pasterellez. Alynǵan málimetterdi anyqtaý úshin zerthanalyq tekserýler qaıta jasalynýda. Aıta ketý kerek, keselge tek kóktemde týǵan jas mal shaldyqqan. Olardyń aýyrý sebebi kóktemgi jaýyn-shashyn men ylǵal bolýy múmkin. Óıtkeni, qyrylǵan qozylar kóktemde sýyq jer ústinde jıi túnegeni anyqtaldy. Búgingi kúni 185 bas mal óldi. Veterınarlar syrqattanǵan qozylarǵa egý jumystaryn júrgizýde. Oqıǵa bir ǵana sharýa qojalyǵynda tirkeldi», - dep málimdedi Atyraý oblysy ákimdiginiń baspasóz qyzmetinen.