Qazaqtyń taban tirep, jurt qaraıtqan jeriniń qaı-qaısy bolsa da kıeli, qasıetti. Sondyqtan da án-jyrymyzdyń basym bóligi el men jerge, taý men dalaǵa, ózen-kólge arnalyp jatady. Sondaı ánderdiń qataryn jaqynda «Aýylǵa saǵynysh» atty án tolyqtyrdy.

«Týlaǵan tolqyn sezim basylmady-aý,

Bir xabar keler me dep Boǵda taýdan...», - dep keletin án joldarynan-aq ánniń qaıda arnalǵanyn túsinesiz. Án avtory týǵan jerine «Sary Arqadan kóshken bulttardan sálem» joldaıdy. Saǵynyshyn jetkizedi.

«Shyn máninde ol saǵynysh – «Aǵajaı» dep án salǵan Altaı aýǵan qandastardyń saǵynyshyndaı; taǵy sol «Altaıym» dep alpys jyl ańsaǵan, «Qaıran Altaı» dep án salǵan Halıfa Altaıdyń saǵynyshyndaı; Jaıyr taýdy jyrlaǵan, Jaıyryn Atamekenge ákep alǵysy keletin shaıyr, Jarken Bódeshtiń saǵynyshyndaı; «Baýyryńa bir baryp, eneıinshi Kúnes-aı» deıtin Ermurat Zeıipxannyń saǵynyshyndaı basylmaıtyn saǵynysh», - deıdi avtor.

Bul ándi tyńdaǵan kisi úlken qımastyqtyń, jat qolynda, bógdeniń tabanynda qalǵan topyraqqa degen «áttegen-aı» kóńildiń saǵynyshpen qabysqan, ókinish búrkelgen emosıasy jasyrýly jatqanyn da baıqaı alady.

Ánniń avtory –  ult múddesin uran etken aıtýly azamat, aqyn, jýrnalıs Erlan Tóleýbaı.  Erekeń buǵan deıin de óziniń jáne basqa da aqyndar sózine birneshe án jazǵan.

«Jańǵyryp jartasyńnan estiletin,

Daýysyn ularyńnyń saǵynamyn», - dep aıaqtalatyn ándegideı, Boǵda taýy - ormany ańnyń alýan túri jorytqan, qyry malǵa shuraıly, aspanynda qyran qalyqtaǵan qutty aımaqtardyń biri. Boǵda – Qytaıdaǵy qazaq dıasporasy qonystanǵan aýmaqtardaǵy Saıram, Qanas sıaqty úsh iri kóldiń biriniń ataýy. Qazaqtyń kóz marjandarynyń biri dese de bolady. Boǵda taýy teńiz deńgeıinen 4545 m bıiktikte ornalasqan. Ular qusy da, bıik jartasta, quzar shyńdarda tirshilik etetin kıeli qustardyń biri. Án avtorynyń saǵynyshy - án sózinde sımvol etilgen «Ulardaı» bıikke órlegen, asqaq qalyqtaǵan taý saǵynysh bolsa kerek. Ol, saǵynysh qana emes, jyraqtaǵy elge, alystaǵy aǵaıynǵa, solardyń Atamekenge degen ańsaryna týǵan maxabattyń dál ózi.

Ándi «Qazaqstan daýysy» megajobasynyń 2015 jylǵy jeńimpazy Muratbek Haırolla oryndaıdy. Án ornalastyrylǵan Qytaıdaǵy etnıkalyq qazaqtar qaraıtyn ınternet kontentte, alǵashqy kúnniń ózinde-aq án jarty mıllıon retten artyq tyńdalǵan kórinedi.

«Qamshy» portaly jańa ánniń tusaýyn kese otyryp, saǵynyshqa toly án mátini men áýeniniń avtory Erlan Tóleýbaıǵa shyǵarmashylyq tabys tileıdi.