01.04.

Bir kúnim muń men nala, bir kúnim qysqa tátti tús. Biz menmendikpen, kóńilshektikpen kúresip kún kórýdemiz. Ne ózimdi, ne ony, ne myna keýdedegi júrekti túsinbeımin. Men súıýden sharshap baramyn...

07.04.

Túni boıy kóz ile almadym. Kóz aldyma ár túrli beıneler keldi. Olardy qansha qýsam da boı bermedi, jetkizbedi. Áıel adamnyń júregin ne bulaı jaratty eken jaraly etip?!

10.04.

Ol maǵan kúlimsirep qarady. Bárin umytqandaı boldym. Qushaǵyna aldy, erkelim kelip ketti. «Janym» dedi, júregimde jaz ornady. Eshqaıda barmaı, eshkimge til qatpaı, meniń qasymda qala bergenin qaladym. Ol ony biraq túsinbedi.

15.04.

Men bar júregimmen bir adamdy súıemin, ol da maǵan yntyzar. Biraq osy bir názik sezim ǵashyqtarǵa nelikten tek qana qýanysh pen shattyq syılaı almaıdy?! Usaq- túıekke bola daýlasyp, til tabyspaı únsiz qalýdan mezi bolamyn. Ondaı jaǵdaıda myna keýde bir mezette órt qushaǵyna aınalady. Ne bir aýyr sózder aıtqym-aq keledi. Bir-birimizge shydaı almaı aıtamyz da. Kóńilge qaıaý túsirip alyp, sosyn barmaq tústeımiz.

19.04.

Biz saıabaqatardy aralap, kóshe kezip, jaıaý júre berdik. Adamnyń janyna tynyshtyq syılaǵan kesh bitpese ǵoı dep armandadym. Keshegi renish, keshegi mazaly oı este joq. Sezip kele jatqanym tek onyń ystyq alaqany, salaly saýsaqtary. Baqyttymyn.

25.04.

Dál qazir ol neni oılap jatyr eken?  Ol meni men ony súıgendeı súıe me? Atalmysh suraq mıymdy tesip jibererdeı. Men qyzǵanýdy, qorqýdy qashan qoıamyn?!

29.04.

Óz jazǵandarymdy ózim oqyp, oqyrmannan qysylyp otyrmyn. Sezimniń yǵyna jyǵylýǵa daıyn turatyn, kóńilshek, kóńilsiz qyzbyn. Men ózimdi jete túsine almasam, ózge jan qaıtip túsinsin?!

05.05.

Ol súıýdi, saǵynýdy, erkeleýdi, baǵalaýdy úıretti. Jylasam da, jyndansam da janymnan árkez tabyldy. Astanadan kelgen qyzǵa Almatyny tartý etti. Sonysymen júrekte qalyp qoıdy. Mahabbat kúndeligi munymen bitpeıdi. Bári áli alda. Renjýge emes, rıza bolýǵa úırenemin. Kiná izdeýge emes, keshirýge asyǵamyn. Biraq qyzǵana bermekpin...

Jalǵasy bar...

(s) Tobyldyń tolqyny