Búgin, «Jas Alash» pen «Trıbýna» gazetteri birlesip, Almatydaǵy «Astana» qonaq úıinde, «Úshtuǵyrly til saıasaty» men basqa da qoǵamdyq problemalarǵa qatysty qoǵamdyq jıyn ótkizdi. «Jas Alash» gazetiniń bas redaktory Rysbek Sársenbaı men «Trıbýna» gazetiniń bas redaktory Janbolat Mamaı tarapynan ótkizilgen jıynǵa zıaly qaýym ókilderi,  aqyn-jazýshylar men bir top ult janashyrlary qatysty. Olardyń arasynda saıasatker aqsaqal Serikbolsyn Ábdildın, jazýshy Qabdesh Jumádilov, Mekemtas Myrzahmetov, aqyn Muhtar Shahanov, Temirhan Medetbekov, saıasatker Dos Kóshim jáne Qanaǵat Júkeshov, Myrzan Kenjebaı sıaqty azamattar bar.

Jıynǵa sondaı-aq Bilim jáne ǵylym mınıstri Erlan Kenjeǵalıuly Saǵadıev arnaýly shaqyrylǵan. Alaıda, ol, jıynǵa kelmedi. Jıynǵa kelmeý sebebin bir kún qalǵanda, mınıstrliktiń baspasóz hatshsy, Sársenbaıuly men Mamaıdyń atyna arnaýly hat jazyp, qyzmettik qarbalstyǵymen túsindirdi. Biraq, jıynnyń ótýin qoldaıtynyn jetkizgen.

Qoǵamdyq tyńdaýǵa kelgender «Úshtuǵyrly til» saıasatyna bir aýyzdan qarsylyǵyn bildirip, óz kózqarastarymen bólisti. Jıyn barysynda Til máselesi ǵana kóterilgen joq. Jer máselesi boıynsha sotqa tartylyp jatqan belsendiler Maks Boqaev pen Talǵat Aıannyń máselesi de kóterildi. Olardyń qamýda otyrýy jer máselesiniń túbegeıli sheshim tappaǵanynyń nátıjesi ekeni aıtyldy. Sóz alǵan Janbolat Mamaı, «olar jýyq arada aqtalyp shyqpasa, 16 jeltoqsanǵa qaraı «halyq qaharmany» dep ataıyq, halyq atynan marapattaıyq!» dedi. Bul pikir de bir aýyzdan qoldaýǵa ıe boldy.

Jıynǵa qatysýshylar otyrys sońynda arnaýly qarar qabyldady. Qarar mátinin jaqyn ýaqytta «Qamshy» portalynan oqı alatyn bolasyzdar!