Bútindeı bir aýdanǵa Alash kósemi Álıhan Bókeıhannyń esimi berilip jatqanda, Qaraǵandydaǵy Saran qalasyndaǵy  238 kósheniń eń bolmaǵanda bireýi qazaqshaǵa ózgertilse degen halyqtyń armany oryndalmaıtyn sıaqty. Bul týraly «Qamshy» portaly «31 arna» jańalyqtaryna silteme jasap habarlaıdy. 

«Rabochaıa», «Festıválnaıa», «Veselaıa», «Solnechnaıa» sıaqty Saran qalasyndaǵy kóshelerdiń sany130-dan asyp jyǵylady eken. Mundaǵy 238 kósheniń qazaq tilindegisi bar bolǵany segiz paıyzdy ǵana quraıdy. Turǵyndar kóshelerdiń attaryn tarıhı ataýlarǵa ózgertýdi surap, jaýapty mekemelerge usynys hat ta joldapty. Biraq, kóshe attarynyń eskirip, mán-maǵynasyz ekenin moıyndaǵan tilderdi damytý bóliminen áli kúnge deıin jaýap bolmaǵan. 

Tilshilerdiń aldynada ashyǵyn aıtqan qala ákimi qazaqsha ataýǵa qarsy. Saran qalasynyń ákimi Anatolıı Shkarýpa kóshe attaryn aýystyrýǵa oryndaýǵa asyqpaıdy. Óıtkeni, dańǵyldardyń attaryn aýystyrý jat nárse dep otyr.

Biraq ekinshi bir sózinde qala ákimi ataýlardy aýystyrý máselesi qaralyp jatyr degenge sendirdi. Sózinshe, qujattar da ázirlenip jatqan kórinedi. Al kóshelerdiń esimi qashan jańartylatynyn sheneýnik aıtpady. 

Eske salatyn bolsaq, Qazaqstanda kóshelerdiń sovettik kezeńdegi ataýlaryn ózgertý máselesi óte kúrdeli. Atap aıtqanda, Mırzoıan ataýyndaǵy kóshege qazaqsha ataý berý respýblıkalyq deńgeıde qatty talqylanǵan edi.