Búgin Qazaqstan Respýblıkasynyń egemendik alǵan kúni. Kúntizbede erekshe data bolmaǵanymen ár qazaq úshin máni erekshe mereke. 1990 jyly 25 qazan kúni 18 saǵat 55 mınýtta Qazaqstannyń «Memlekettik egemendik týraly Deklarasıasy» qabyldanǵanyn eske sala keteıik. 2009 jylǵa deıin bul kún Qazaqstan kúntizbesinde "Respýblıka kúni" retinde belgilenip, memlekettik deńgeıde demalys jarıalanatyn.
10 jyl buryn ata jurtyna oralǵan ulaǵatty ustaz Aıatjan Ahmetjannyń dál osy kúni jazylǵan ǵumyry on jyldyq óleńin "Qamshy" portaly nazarlaryńyzǵa usynady.
Táýelsizdik bastaýy
Ottan ystyq, Otannyń uly esimin,
Alystan ańsap,
Arnamnan tasyp jetildim.
Jalyndap janǵan jas kezde,
Bodany bolyp basqa eldiń,
Kelmeıdi meniń ketilgim.
Bodandyq buzyp qursaýyn,
Jyrlap Otan qushaǵyn,
Kórsetip kúshin ór tildiń.
Aryna mingen arlan bop,
İshinde júrsem arman joq,
Jalyndap janǵan órtiniń.
Bodan eldiń jatqanda derti tasyp,
Araı tańnyń shapaǵyn serpip ashyp.
Erlik jiger, qazaqtyń qany tasyp,
Etken soń bostandyqty Alla násip.
Qazaqtyń jarqyratyp juldyzdaryn,
Aldyq, mine, táýelsizdik betin ashyp.
Bul kún degen Otanymnyń kóktemi,
Jarqyraǵan juldyzdary kóktegi.
Bul kún degen táýelsizdik jarshysy,
Qazaǵymnyń egemendikke jetkeni.
Respýblıkasy qazaqtyń,
Moıyndalǵan azat kún.
Óshkeni janyp qaıtadan,
Ulany keler shettegi.
Bul kún degen táýelsizdik bastaýy,
Qazaǵymnyń jańa basqan asqary,
Án men jyrǵa toltyryp,
Táýelsizdik shashýyn,
Kómkerip jyrmen shashqany.
Egemendi erteńge,
Shýaq shashqan attany.
Qazaqtyń máńgi rýhyn,
Súıe bil qazaq jastary!
Pikir qaldyrý