Qazaq ádebıetiniń klasık jazýshysy, Memlekettik syılyqtyń laýreaty Saıyn Muratbekovtiń týǵanyna 80 jyl tolýyna oraı Taldyqorǵan qalasyndaǵy İ. Jansúgirov atyndaǵy Mádenıet saraıynda «S. Muratbekov prozasy – altyn ǵasyr ádebıetiniń marjany» atty eske alý keshi ótti. Jıynǵa Qazaqstan Jazýshylar odaǵynyń tóraǵasy Nurlan Orazalın bastaǵan bir top ádebıet qaıratkerleri qatysty.
Jıyn "Jetisý" telearnasy daıyndaǵan jazýshy týraly fılm kórsetýden bastaldy.
Mereıtoıǵa jınalǵan qaýymdy oblys ákiminiń birinshi orynbasary Lazzat Turlashov quttyqtady.
- Saıyn Muratbekov osy ólkede týyp – ósip, qalyń qazaqtyń ortaq maqtanyshyna aınalǵan jazýshy. Elin, jerin súıip, aıalaı bilgen azamatqa degen halqynyń peıili, yqylasy erekshe. Búgin ortamyzda ózi bolmasa da, jazǵan eńbekteri qazaq ádebıetiniń altyn qorynda saqtalyp, jastarǵa úlgi-ónege bolyp qalary anyq. Halqymyzdyń óshpes ónerin nasıhattaıtyn, keıingi jastarǵa taǵylym bolatyn osyndaı sharalarymyz jalǵasa bersin! Aǵamyzdyń urpaqtaryna qut-bereke, yrys pen baqyt, barsha jetisýlyqtarǵa tabys, berekeli ómir tileımin! – dedi L. Turlashov óz sózinde.
Munan keıin Qazaqstan Jazýshylar odaǵynyń tóraǵasy, Memlekettik syılyqtyń ıegeri Nurlan Orazalın jazýshynyń bolmysy, minezi, tazalyǵy, talanty týraly erekshe tebirene sóıledi. Saıyn Muratbekovke aldyndaǵy aǵa býyny salmaqty baǵa bergen, áńgime janryndaǵy sheberligine tánti bolǵannan «qazaqtyń Chehovy» dep ataǵan sátterin de súısine eske alyp, qazaq prozasyna qubylys bolyp kelgen jazýshynyń murasy máńgilik ekenin qadap aıtty.
Sondaı-aq eske alý keshinde jazýshylar Beksultan Nurjekeev, Ahmetjan Ashırı, Kádirbek Segizbaıuly jáne t.b. qalamgerler sóz alyp, Saıyn aǵanyń shyǵarmashylyq belesteri týraly áńgimeledi.
Jıyn sońynda teatrlandyrylǵan kórinis sahnalanyp, Súıinbaı atyndaǵy oblystyq fılarmonıa ártisteriniń mereıtoıǵa arnalǵan konserti kórsetildi.
Almaty oblysy ákimdiginiń resmı saıty
