Bıylǵy jınalǵan ónimnen Kóksý qant zaýyty osy maýsymnyń alǵashqy qantyn aldy. Zaýyt ujymyn osy mańyzdy oqıǵamen quttyqtaýǵa oblys ákimi Amandyq Batalov arnaıy bardy, dep habarlaıdy Almaty oblysy ákiminiń baspasóz qyzmeti.
Kóksý qant zaýytynyń jańǵyrtý jumystary men jetken jetistikteri týraly kásiporynnyń quryltaıshysy Nurlan Tileýbaev baıandap berdi.
- Bıylǵy jyly mıllıard teńgeden astam qarjy quıyp, kásiporynǵa jańǵyrtý jumysyn jasadyq. Qazir barlyq júıeler avtomattandyrylǵan, prosesterdiń bári de bir operatordan basqarylady. Sonymen qatar fıltrler aýystyrylyp, bul óz kezeginde ónimdilikti kóterýge jáne elektr energıasynyń tutyný mólsherin azaıtýǵa yqpal etti. Bul bizdiń jumysymyzdyń alǵashqy kezeńi ǵana, zaýyttyń jańǵyrtý jumystary kelesi jyly da jalǵastyrylatyn bolady, - dedi N. Tileýbaev.
Oblys ákimi Amandyq Batalov operator bólmesin, óńdeý sehyn aralap, daıyn ónimdi kórdi. Mundaı jaqsy kórsetkishke memleket qoldaýynyń arqasynda jáne qyzylshashylar men qant zaýyty ókilderiniń birlesken jumysynyń nátıjesinde qol jetkizilgenin atap ótti.
- Búgin biz bıylǵy jyldyń alǵashqy qantyn aldyq. Bul - biz úshin asa mańyzdy oqıǵa, uzaq ta qajyrly eńbektiń kórsetkishi. Ózara yntymaqtasa atqarǵan jumystyń nátıjesinde Almaty oblysynda bıylǵy jyly 6800 gektarǵa qant qyzylshasy sebildi. Shamamen 240-250 myń tonna ónim jınaımyz dep josparlap otyrmyz. Odan mólsheri 24-25 myń tonna qant alynady. Bul – jaqsy kórsetkish. Egis aınalymynyń talaptaryn eskere otyryp, qyzylsha alqabynyń kólemin jyldan jylǵa arttyratyn bolamyz. Iaǵnı alynatyn qant kólemi de ósedi degen sóz. Óńdeý jumysy kedergisiz júrý úshin aldaǵy ýaqytta Qarabulaq, Alakól, Aqsý qant zaýyttaryn da iske qosýdy josparlap otyrmyz. Qabyldanǵan keshendi sharalar Memleket basshysynyń halyqty otandyq qantpen qamtamasyz etý týraly tapsyrmasyn abyroımen oryndaýǵa serpin beredi dep oılaımyn. İshki qajettilikti ótegennen keıin odan ári biz ónimimizdi eksportqa shyǵarýǵa talpynatyn bolamyz, - dedi oblys ákimi Amandyq Batalov.
Óńir basshysy A. Batalov N. Tileýbaevtyń usynysy boıynsha kelesi jyly memlekettik-jekemenshik áriptestik negizinde qant qyzylshasyn ósiretin aýdandarda oblys ákimdiginiń kómegimen qant qyzylshasyn qabyldaıtyn pýnktter ashylatynyn aıtty. Onda zaýyt quryltaıshylary zerthana men ólsheý qurylǵylaryn ornatpaqshy. Qyzylsha ósirýshiler ósirgen tátti túbirdi qabyldaý pýnktine ákelip tapsyrady, al quryltaıshylar ony zaýytqa óz kúshterimen jetkizedi. Eseptesý jergilikti jerde sol mezette júrgiziledi. Sonymen qatar Kóksý aýdanyndaǵy qabyldaý pýnktinde qabyldaý isin jyldamdatýǵa múmkindik beretin germanıalyq qurylǵy qoıylatyn bolady.
Zaýytqa ónim ákelgen sharýalar qant qyzylshasyn ósirý men ótkizý isin jeńildetý baǵytynda engizilip jatqan jańalyqtardy estip, rızashylyqtaryn bildirdi.
