Qazaqstannyń Mádenıet jáne sport mınıstri Arystanbek Muhamedıuly qarjy jymqyrdy degen aıyppen qamaýǵa alynǵan Qazaqstannyń halyq ártisi Tuńǵyshbaı Jamanqulovty bosatý týraly tergeý organdaryna ótinish bermek, - dep habarlaıdy Qamshy.kz.
Bul týraly birneshe adammen birge A. Muhamedıulymen kezdesken belgili saıasattanýshy Erlan Saırov málimdedi.
«Bir top adam Mádenıet jáne sport mınıstrimen kezdesip, QR Halyq ártisi Tuńǵyshbaı Jamanqulovty bosatý týraly ótinish jasadyq. Arystanbek Muhamedıuly Tuńǵyshbaı Jamanqulovty óziniń jeke jaýapkershiligine tapsyryp, qamaýdan bosatý týraly ótinish beretinin aıtty», - dep jazady E. Saırov.
Esterińizge salsaq, 69 mıllıon teńge kóleminde qarjy jymqyrdy degen aıyppen T. Jamanqulov keshe ustalǵan bolatyn. endi qoldanystaǵy zańnamaǵa sáıkes, úsh kún ishinde tergeý kezinde qoldanylatyn bultartpaý sharasy sot sheshimimen belgilenetin bolady.
