Elimizdiń birqatar teatr qaıratkerleri QR Halyq ártisi, akter, rejıser Tuńǵyshbaı Jamanqulovtyń qamalýyna baılanysty halyknews.kz portalyna pikir bildirdi, - dep habarlaıdy Qamshy.kz.

Esmuhan Obaev – Qazaqstannyń Halyq artısi, profesor

Men bul jóninde pikir aıta almaımyn. Sebebi ne úshin, qalaı…uqpaımyn. Senýge bola ma, bolmaı ma, bul jóninde esh habarym joq. Uzaq jyldar qazaq ónerinde, professıonaldy ónerinde, kınosynda, teatrynda jumys istegen adam. Ony eshkim syzyp tastaı almaıdy, al qalǵanyn men uqpaımyn.

Erkin Jýasbek – QR óner qaıratkeri, teatr synshysy

«Aqqa – Qudaı jaq» deıdi. Eger aǵamyz shyn máninde sondaı bolǵan jaǵdaıda, men aqtalyp shyǵatynyna kámil senemin. Qazir ómir osyndaı bolǵandyqtan, múmkin bir aldyn-ala tekserý, taǵy da basqa sharanyń sharýasy shyǵar degen úmitim bar. Kimge bolsa da, bul ózi ońaı bop turǵan sharýa emes. Sondyqtan, úmitim bireý-aq, aqtalyp, óziniń otbasyna, ortamyzǵa qaıtadan keledi degen oıdamyn. Bul da bir ýaqytsha nárse shyǵar.

Ásker Quldanov – qoıýshy-rejısser, QR mádenıet qaıratkeri

Teatr sahnasynda onyń eń basty róli, qazaqtyń betke shyǵar adamdarynyń barlyǵyn oınaǵan azamat. Men Mınıstrge aıtar edim, bul azamatty qorlaǵany – ónerdi qorlaǵany, qazaq teatrlaryn qorlaǵany jáne Mınıstr ózin qorlaǵany dep esepteımin!

Qýandyq Qasymov – Qazaqstannyń eńbek sińirgen qaıratkeri, Ońtústik Qazaqstan oblystyq teatrynyń kórkemdik jetekshisi

Qyr-syryn bilmeımiz ǵoı, arǵy jaqta ne bolyp jatqanyn. Onyń qandaı qupıa ekeni bolashaqta ashylar. Aq, adal jan retinde men biletinmin. Ol kisi teatrdyń tabaldyryǵyn attap, akterlyq qyzmetti bastaǵan, árqashanda da ujymǵa oń kózimen qarap turǵan adam. Bul keleńsiz jaǵdaılar da basynan óter, biraq jasy kelgende óte qıyn. Adamnyń istegen isi báribir erteń aqtalyp shyǵady ǵoı dep oılaımyn. Óıtkeni, ol qazaq teatrynyń qalaı bolsa da – tulǵasy. Qandaı jaǵdaı bolsa da – tulǵasy. Sahnada jasalǵan óziniń qaıtalanbas obrazdary bar, ony, ol ónerdi  eshkim tartyp ala almaıdy.