Jaqynda Shynjań uıǵyr telearnasynyń «Shyryn tús» baǵdarlamasynyń taqyrybyna arqaý bolǵan qandasymyz Zaıra Aseıinǵazyqyzynyń izgi isteri Qytaı halqyn tebirentip, áleýmettik jelilerde qyzý talqylanyp jatyr, dep habarlaıdy QazAqparat.
Baǵdarlamada belgili bolǵandaı, Zaıra Aseıinǵazyqyzy ata-anasynan aıyrylǵan jarymjan balalarǵa arnaıy ortalyq ashqan eken. Ol osy kúni atalǵan ortalyqta ár ult ókilderinen 62 múgedek ári jetim balalardy óz qamqorlyǵyna alyp, oqytyp, túrli qajettilikterine kómektesýde. Zaıra bul isin óziniń basynan ótken taǵdyrymen baılanystyrady. «Meniń ózim 4 jasymda jetim qaldym. Er jetýime, ómirimdegi qıyn kezeńderdi eńserýge kóptegen meıirban adamdar kómek berdi. Kishkene kezimde turmysymyz óte tómen boldy. Sonda, keıin er jetkende, ózim sekildi jetim balalarǵa járdem qylsam, mańdaıynan syıpasam dep armandaıtynmyn. Mektep bitirgennen keıin joǵary oqý ornyna túsýge qarajatym bolmady. Sosyn zaýytqa turyp, aýyr jumystar isteýge májbúr boldym», - dep áńgimeleıdi Zaıra Aseıinǵazyqyzy.
Osylaısha erte jastan eńbekke aralasqan ol kóptegen qıynshylyqtardy bastan keshkenin aıtady. Syrqattanyp tósek tartyp qalǵan kezderi, tipti, 40 kúndeı tek qurǵaq nan jep, qaınaǵan sýmen ózek jalǵaǵan kezder bolypty. Áıtse de, taǵdyrdyń aýyr synaǵyn eńserýge meıirban jandardyń kómegi kóp septigin tıgizgen. «Aýrýym asqynǵan kezde jeke emhanasy bar bir dáriger kisiniń arqasynda tegin emdelip, jazyldym. Bul maǵan jiger berdi. Aqsham joq bolsa da, ómirde jaqsy adamdar bar ekenine kózim jetti. Keıin kóshede nan surap, qaıyr tilep júrgen bir ájeni kórip, áńgimege tarttym. Ol kisiniń balalary ómirden erte ozypty. Men ájege kómektesip, oǵan bala boldym. Osylaısha ómirden ózime kóptegen analar, ákeler taptym. Ózim kórgen qıyndyqtardy búgingi jetimder kórmese eken dedim. Sol úshin ata-anasynan aıyrylǵan múgedek balalardy jınap, baýyryma bastym. Olardyń ónerin ushtaýǵa, ómirden óz úlesterin alýǵa barynsha jigerlendirip kelemin. Búginde 8 ult ókilinen 62 balam bar. Olardyń biriniń ákesi joq, biriniń sheshesi joq, bireýiniń aıaǵy joq, biriniń kózi kórmeıdi», - deıdi Zaıra Aseıinǵazyqyzy.
Onyń aıtýynsha, bul álem jaqsy adamdarǵa toly. Ómirde barlyq adam teń. Alaıda, solaı bola tura, adamdar aqshadan, jaqsy ómirden jalyǵýy múmkin, al izgilik pen mahabbattan, qamqorlyq pen meıirimnen adam balasy esh jalyqpaıdy. «Men bul jetimekterdi izgi-nıetti jandardyń kómeginiń arqasynda baǵyp jatyrmyn. Kómek qolyn sozatyndar kóp. Qazir balalarymnyń 20-sy úılendi. Men osy ortada júrip kóptegen áserli, izgi isterge kýá boldym. Birde 23 jastaǵy on eki múshesi saý, oqyǵan qyz kelip, kózi múldem kórmeıtin zaǵıp jigitpen bas qosty, otaý qurdy. Aınalasyndaǵy biraz jurt oǵan: «Sen oqyǵansyń, bolashaǵyń bar qyzsyń, nege múgedek janǵa óz taǵdyryńdy baılaısyń», dep qarsy boldy. Sonda álgi qyz: «Men bul dúnıeden eshteńe istemeı ótsem de, osy jigittiń qos janary bolaıyn», - dedi. Mine osydan artyq qandaı adamgershilik, qandaı izgilik bar», - dep kózine jas alady Zaıra Aseıinǵazyqyzy. Baǵdarlama barysynda, Zaıra Aseıinǵazyqyzynyń tárbıesindegi jarymjan qazaq qyzy án saldy jáne qoly joq, qulaǵy estimeıtin, sóıleı almaıtyn balanyń aýzymen, aıaǵymen salǵan sýretteri kórsetildi. Sonymen birge baǵdarlamaǵa qonaq retinde shaqyrylǵan kásipkerler qaısar qazaq qyzynyń meıirimdiligine, erligine alǵystaryn bildirip, óz kómekterin jasady.
