Kýáger EXPO-2017 aýmaǵynda bolǵan tótenshe jaǵdaıdyń mán-jaıyn aıtyp berdi, - dep habarlaıdy Tengrinews.kz saıty.

Kórme keshenindegi pavılondarda jumys istep júrgen lıft kompanıasynyń qyzmetkeri Nıkolaı Kostenko tótenshe jaǵdaı bolmaı turyp 2 mınýt buryn ketip, aman qalǵan. Jýrnalıserge bergen suhbatynda ol bolǵan oqıǵanyń mán-jaıyn aıtyp berdi.

"Tótenshe jaǵdaı S 1-3 pen S1-4 pavılondarynyń arasynda bolǵan. Olardyń arasynda shynydan salynǵan kópir ornalasqan edi. Endi sol kópir búgin opyryldy. Myna jaǵdaı bolmas buryn ketip qalǵanym jaqsy bolypty. Men pavılonǵa kirgen soń ǵana jer silkinisi bolǵandaı dybystardy estidim", - dedi er adam.
Onyń aıtýynsha, bul oqıǵa túski úzilis kezinde bolǵan. Sol ýaqytta onda jumysshylar da bolmapty.

Sondaı-aq, er adam qazirgi ýaqytta onda tótenshe jaǵdaıdyń mán-jaıy anyqtalyp jatqanyn aıtty. Onyń oıynsha, bul jaǵdaı myna sebepterge baılanysty bolyp otyr: "Shynydan salynǵan kópir jaýǵan qardy kótere almady. Qazir endi bul máselemen aınalysady. (...) Eger de munyń barlyǵyn qaıta qalpyna keltiretin bolsa, bul qıynǵa soǵady. Onsyz da bul shyny kópirdi bir jyl boıy salǵan bolatyn", - dedi Nıkolaı Kostenko.

Lıft kompanıasynyń qyzmetkeriniń aıtýynsha, opyrylǵan qurylys bólikteriniń astynda pavılondardyń birine ornatylýy tıis eskalatorlar qalyp qaldy.

"Biz pavılondarǵa lıft ornatyp jatqan bolatynbyz. Jumysshylarymyz áreń degende ol jaqtan qashyp shyǵa alady. Biz eki eskalatordy ornatýymyz kerek bolatyn. Olardy syrtqa shyǵaryp, túski asqa ketken edik. Osylaısha eskalatorlar opyrylǵan qurylystyń astynda qalyp qoıdy", - dedi kýáger.

Eske salaıyq, osyǵan deıin Astanadaǵy EXPO-2017 aýmaǵynda qurylys bóliginiń opyrylǵany habarlanǵan bolatyn. Bul búgin, 16 qarashada birneshe saǵat buryn bolyp otyrǵan jaǵdaı Al keıinirek onda bolǵan tótenshe jaǵdaıdan bir jumysshynyń aýrýhanaǵa túskeni aıtyldy.