Aqtóbege Ózbekstannan qonys aýdarǵan Kúljumyrovtar otbasynda tórt bala bar. Aqerke, Ásemgúl, Aısulý, Janat esimdi qyzdardyń aldy onda, kishisi tórt jasta. Qazir olar isherge tamaq, kıerge kıim taba almaı júr. Ákesi Mahmýd Kúljumyrov jaldamaly jumys isteıdi, al anasy Saodat Kúljumyrova densaýlyǵy nasharlap, qujattary rettelmeı, Ózbekstanǵa qaıta oralǵan. Qańtar aıynda shekara asyp ketken ana áli kúnge deıin oralmady. Al kir jýý, tamaq istep, úı jınaý, balalarǵa kútim jasaý sekildi úı sharýashylyǵynyń bári on jastaǵy Janat Kúljumyrovanyń jaýapkershiligine artyldy. Bastaýysh klass oqýshysy sabaqty jaqsy oqıdy, bárine úlgeredi. Osydan bes jyl buryn Aqtóbege kóship kelgen qandasymyzdyń otbasynda Baq.kz tilshisi de boldy.
Aqtóbe qalasyndaǵy saıajaılardyń birinde aıadaı bólmeni 15 myń teńgege jalǵa alyp otyrǵan otbasynyń jaǵdaıy múshkil. Balalar ana kútimine zárý, jýyndyryp, kıindirip, sabaǵyn oqytatyn adam joq. Otaǵasynyń negizgi mamandyǵy esepshi bolǵanymen, ómir boıy qurylysta jumys istep keledi. Qazirgi ýaqytta tań ata úıinen shyǵyp, kesh bata kelip júr. Bul ýaqytta úı sharýashylyǵynyń bári on jastaǵy Janat Kúljumyrovanyń mindetine júktelgen. Ol bala bolǵanymen erte eseıgen, úıine kelgen qonaqty jarqyn júzben qarsy alady.
«Qazir bárimiz aýyryp júrmiz, salqyn tıip qalǵan. Eshkim joq bolǵan kezde sińlilerime dárini ózim beremin. Senbi kúni kózim aýyryp, sabaqqa barmaı qaldym. Sińlim Aısulý da sabaqqa barmady, qyzýy kóterildi», - dedi Janat Quljumyrova.
Birine sýyq tıip aýyryp, ekinshisine juqqan tumaý otbasynyń mazasyn qashyrdy. Dári-dármek alatyn da qarjy joq. Jedel járdem qyzmeti alǵashqy kómekti kórsetip, turǵylyqty jeri boıynsha emhanaǵa tirkelýdi usyndy.
Úıdiń úlkeni Janat №22 orta mektepte, Aısulý №8 orta mektepte oqıdy. Mahmýd Kúljumyrov kútim jasaýǵa múmkindigi bolmaı, balalardyń janyna taıaýda Qaraqalpaqstannan ájesi keldi. Zeınetker kelininiń hálin málim etti.
«Kelinim kıim-keshek alyp, satty. Aqtóbe bazarda saýda jasap, bankrot bolǵan. Qazir áli de 200 myń teńge berejaǵy bar. Qujattary durys bolmaı shekara asyp ketti, endi qarjy tapshylyǵynan keri orala almaı otyr ári ara-tura esinen tanyp qalady, aýyrady. Anasynyń bolmaǵany balalarǵa zıan. Bıyl bireýi dalaǵa shyǵyp ketip, joq bop ketken. Kórshi-kólem izdep, kóp uzamaı tabyldy. Úlkeni mektepke ketkende, balalar qaraýsyz qalady. Sosyn men qaraýǵa, kútim jasaýǵa keldim»,- deıdi Tilláhan Yrzabaeva.
Qaraqalpaqstannan ýaqytsha balasynyń úıine qonystanǵan T. Yrzabaevanyń aıtýynsha, balalardyń bireýi ǵana Qazaqstanda dúnıe kelgen. Kóship kelgenderine 5 jyl bolǵan oralmandar otbasy qazirgi kúni kórshi eldiń tólqujatymen júr. Otaǵasy Mahmýd Kúljumyrov qana oralman kýáligin alyp, jeke kýáligin kútip júr.
«Jeke kýálik alý úshin Almatydaǵy elshilikke barý kerek eken. Oǵan da qarjy tapshy. Qazirgi ýaqytta aýmaǵy 20 sharshy metrge jetpeıtin aıadaı bólmede jan baǵyp otyrmyz. İsher tamaǵymyz joq. Balalar kópten et te jemedi. Balam Mahmýd aılyq alyp edi, jyl boıy tólenbegen páteraqysyna berdi. Tamaqqa dep 5 myń teńge qaldyryp edi, ol eki kúnde bitti. Al balalarǵa jyly kıim kerek. Olar qazir tanystarymyzdan alǵan kúrteni kıip júr. Kishkentaılarynyń aıaq kıimi tozǵan, dalaǵa shyǵa almaıdy»,- deıdi ol.
Kúljumyrovtar otbasynyń máselesi qala ákimi janyndaǵy kámeletke tolmaǵandardyń isteri jáne olardyń quqyqtaryn qorǵaý jónindegi komısıada qaraldy. Komısıa sheshimi boıynsha otbasynyń 6 jastaǵy qyzy Ásemgúl men tórt jasar Aqerke 5 kúndik balabaqshaǵa beriletin bolady. Buǵan deıin eki túrli mektepte bilim alyp júrgen Aısulý men Janat endi №8 orta mektepte oqıtyn boldy. Eki oqýshy da alǵyr, úzdik oqıdy. Al otaǵasy Mahmud Kúljumyrovqa turaqty jumys taýyp berýge tapsyrma berildi. Sonymen qatar, kóshi-qon polısıasy arqyly tólqujat berý jumystary jedeldetilý mindetteldi. Qazirgi ýaqytta oralmandar otbasy arnaıy beriletin kvotaǵa da ilige almaı otyr. Qıyn jaǵdaıdy bastan ótkerip otyrǵan otbasy aqtóbelikterden kómek kútedi, qaıyrymdy jandarǵa úmit artady.
