Almaty qalasynyń ákimi Baýyrjan Baıbek «Avto Alma Trans» avtobýs parkiniń quryltaıshylary men basshylaryna avtoparktiń tehnıkalyq ahýalynyń nasharlyǵyna  baılanysty sógis berdi, dep habarlaıdy «QazAqparat». 

«Búdjetten qosymsha 15 mıllıondy alasyzdar. (...) 65-shi marshrýtty qarańyz, kim osyndaı avtobýsqa minedi? Sizderdiń bıletterińiz «Ońaı» termınalynyń janynda satylýda, árıne, adamdar mundaı avtobýsqa aqsha tólemeıdi. Naryqta júrgenderińizge qansha jyl boldy? 20 jyldyń ishinde osy úshin uıalmadyńyzdar ma? Qane, sizderdiń avtobýstaryńyzben qalany aralaıyq. 65-shi marshrýt, bir termınal joq, tóbesi shurq tesik. Bul Almatyda! Tóbesi shurq tesik! Men sizderdiń oryndaryńyzda osyndaı bıznesti jaýyp tastar edim, uıatqa qalmas úshin», - degen Baýyrjan Baıbek avtopark basshylyǵy men quryltaıshylaryna sógis berdi.

Qala basshysy munymen toqtamady. Ol avtobýs tóbesindegi kómkermeler ahýalynyń nasharlaǵany, jaryqtandyrý plafonynyń joqtyǵy, eden jabynynyń jyrtyqtyǵy, jaryqtyń túspeýi týraly sóz qozǵady.

«Sizderdi qala túgili, oblysqa kirgizbeý kerek. Tutqa synyp qalǵan, eden jabyny talapqa saı emes, bıletterdi qaıtalap satasyzdar, jolaýshylar oryndyǵy bekitilmegen. Sizder qaladan birdeńe dámetesizder. Birinshi ózderińiz úles qosý kereksizder», - dep jalǵastyrdy ákim. Ákim jaǵdaıdy túzetý úshin avtopark basshylyǵyna eki apta ýaqyt berdi. Júrgizýshilerdiń eńbek aqysyn da nazardan tys qaldyrmady.

«Sizderdiń júrgizýshilerińiz jetpis myń teńgege jumys jasaıtyn, qaıdan ózi, Marstan ba? Greenbus júrgizýshileriniń ortasha jalaqysy 115 myń, al sizderde - 70 myń. Barlyq júrgizýshiler birdeı, olar bir-birimen aralasady. Olardyń otbasy, balalary bar... Jalaqylaryn kóterińizder, sheshińizder. Sapasyna mán berińizder», - dedi ákim avtopark ókilderine.

Óz kezeginde avtoparktyń atqarýshy dırektory Azat Ahlasov bul salada jaǵdaıdyń kúrdelenip, qosalqy bólshekterdiń 50% qymbattap, komýnaldyq tólemniń qymbattap, 4 gektarlyq jer tóleminiń ósip jatqanyn tilge tıek etti. Avtoparkte jalpy 692 qyzmetker jumys jasaıdy. «Biz qarjylyq jaǵynan qoldaý tanytýlaryńyzdy surap edik. Bul aıda 33 mıllıon teńge bólindi. Aqsha qosalqy bólshek satyp alýǵa ketedi, avtopark halyqqa 90% qyzmet kórsetý úshin 650 avtoshına, 380 akýmýlátor satyp alý kerek», - dedi ol.