Keshe, 18 qarasha kúni Almatydaǵy Ó.Joldasbekov atyndaǵy Stýdentter saraıynda "Qamshy" portalynyń uıymdastyrýymen "Kósh jáne Kóshbasshy" atty merekelik konsert ótti. Merekelik keshke "Qazaqstan" ulttyq arnasy aqparattyq qoldaý kórsetti. Almaty qalasynyń turǵyndaryna Stýdentter saraıynyń esigi sol kúni aıqara ashyq boldy. Tegin bılet alamyn deýshiler bar bolǵany erejege saı aldyn-ala saıtymyzǵa kirip, tirkelýi qajet edi.
Myńnan astam kórermen jınaǵan "Kósh jáne Kóshbasshy" konserti rýhanı shóldep júrgen qazaqqa móldir bulaq boldy. Kesh barysynda dástúrli án-jyr, qońyr kúı, eńseni kóterip, rýhty janıtyn patrıottyq týyndylar oryndaldy. Konsertte óner kórsetken barlyq ónerpaz ulttyq múddeni joǵary qoıatyn azamattar ekendigin erekshe atap ótken jón. Bir án oryndaýǵa shyqqan álemdik deńgeıdegi qazaqtyń jeztańdaı ánshisi Maıra Muhammedti halyq sahnadan jibergisi kelmedi. Qalyń qazaqtyń kóńilin qımaǵan Maıra "Aǵajaı, Altaıdaı jer qaıda-aımen" qosa "Búldirgendi" shyrqap berdi.
Kesh shymyldyǵyn qurmetti qonaǵymyz QR Aqparat jáne komýnıkasıa mınıstri Dáýren Abaev ashty. Halyq aldynda sóz sóılegen mınıstr osy kúndi toılap otyrýymyz táýelsizdigimizdiń arqasy dedi.
Dáýren Abaev: Osynyń bári sanaýly kúnderden keıin 25 jyldyǵyn atap ótkeli otyrǵan Táýelsizdigimizdiń jetistigi. 25 jyl boıy qoǵamda birlik pen kelisimdi, turaqty damýdy ornyqtyrǵan, QR halqyn birtutas ultqa aınaldyrǵan Elbasynyń jemisi.
Sondaı-aq, "Qazaqstan" teleradıokorporasıasynyń tóraǵasy Kemelbek Oıshybaev, QR Bilim jáne ǵylym mınıstriniń keńesshisi Raýan Sydyqov, QR SİM Almaty qalasyndaǵy ókildiginiń basshysy Arslan Dandybaev, aqyn Qazybek Isa, QR "Nur Otan" partıasynyń Almaty qalalyq fılıalynyń atynan kelgen qalamger Qaıypmunar Tábeı, QR Mádenıet jáne sport mınıstrliginiń atynan kelgen jýrnalıs Meldesh Ǵalymjan, "Asyl arna" rýhanı-aǵartýshylyq arnasynyń dırektory Muhamedjan Tazabekov, belgili jýrnalıser Serik Abas-shah, Arman Sqabyluly, Serik Ábikenuly, Serik Janbolat keshtiń syıly qonaqtary boldy. "Kósh jáne Kóshbasshy" konsertiniń ótkizilý sebebiniń tereń maǵynasyn túsingen QR Premer-mınıstriniń orynbasary, Aýyl sharýashylyq mınıstri Asqar Myrzabekov óz quttyqtaý hatyn jiberdi. Batys Qazaqstan, Aqmola oblysy, Jambyl oblysy ákimderi atynan kelgen ókilder de kesh qonaǵy bolyp qana qoımaı, ózderimen birge bútin bir oblystyń quttyqtaý-sálemin jetkizdi.
Kópshiliktiń arasynan arnaıy shaqyrtý almasa da boı kórsetken zıaly qaýym kóp boldy. Qazaqtyq múddeni joǵary qoıǵan respýblıkalyq tele-basylymdardyń tilshi-jýrnalısterin de qarapaıym kórermen qatarynan baıqap qaldyq.
Sáýle Ábedınova, jýrnalıs: Búgingi kesh óte tamasha ótti. Men kiremin de shyǵamyn dep kelgen edim. Biraq, myna keshti qımaı, aıaǵyna deıin qalyp qaldym. Dástúrli, taza, jandy daýystaǵy ánderdi estip bir rahattandym. Uıymdastyrýshylarǵa alǵysym sheksiz!
Árbir úshinshi qazaq shetelde ómir súrip júr degen málimet bar. 25 jylda taǵdyr tezimen shekara asyp ketken kóp qazaqtyń mıllıony elimizge oralypty. Bul oılanýǵa da toılaýǵa-qýanýǵa da sebep. Qamshygerler qazaq kóshi toqtamaıtynyna senedi.
