Májilis Tóraǵasy Nurlan Nyǵmatýlın TMD PA jáne UQSHU PA kúzgi sesıasy aıasynda Sankt-Peterborda Kórnekti qoǵam jáne memleket qaıratkeri, ult-azattyq jáne Alash qozǵalysynyń jetekshisi, Alashorda avtonomıaly úkimetiniń tóraǵasy, pýblısıs, ǵalym, aýdarmashy, Semeı oblysynyń atynan   I Memlekettik Dýma depýtaty Álıhan Bókeıhanovtyń eskertkish músininiń ashylýyna qatysty.  Bul týraly "Qamshy" portaly QR Parlamenti Májilis Apparatynyń Baspasóz qyzmetine silteme jasap habarlaıdy.

Saltanatty shara Tavrıcheskıı saraıyndaǵy TMD PA shtab-páterinde ótti. Dál osy jerde I Memlekettik Dýma jıyny ótkizilgen. Nurlan Nyǵmatýlın:

-Eki el Prezıdentteri Nursultan Nazarbaev pen Vladımır Pýtınniń syndarly jáne batyl saıasatynyń arqasynda búgingi kúni Qazaqstan men Reseı eýrazıalyq keńistikte ıntegrasıanyń qozǵaýshy kúshine aınaldy.  Qazaqstan Táýelsizdiginiń 25 jyldyǵy qarsańynda osy eskertkishtiń ashylýynyń mańyzy erekshe. Osy ýaqyttar ishinde bizdiń elderimiz TMD keńistiginde strategıalyq jáne odaqtas áriptestiktiń jarqyn úlgisin kórsetip keledi,-dedi.

Á. Bókeıhanovtyń músini Tavrıcheskıı saraıynyń atrıýmynda ornalasty. Qola músinniń bıiktigi 2 metrden asady. Músin Qazaqstan Parlamenti depýtattary jınaǵan qarjyǵa jasaldy.

Aıta keteıik, osy jyly Á. Bókeıhanovtyń týǵanyna 150 jyl tolady. Mereıtoı   IýNESKO kóleminde atalyp ótpek. Álıhan Bókeıhan 1866 jyly 5 naýryzda dúnıege kelgen. Omby tehnıkalyq ýchılıshesin aıaqtaǵan soń, Sankt-Peterbýrgtegi Orman ınstıtýtyna oqýǵa túsken.