Kentaý qalasy ákimdiginiń baspasóz ortalyǵynda ótken brıfıńte, qalaǵa qarasty Hantaǵy aýylynyń ákimi S.Rasýl jyl basynan bergi atqarǵan jumystary jaıynda málimet berdi. Osy ýaqytqa deıin memleket tarapynan beriletin eń tómengi kedeıshilik jaǵdaıdaǵy ASB járdem aqyny 1 adam alyp kelse, qázirgi tańda mundaı kómekti alatyn adamdar sany joq. Bul da bolsa, aýyl turǵyndarynyń jaǵdaıy jaqsaryp kele jatqanyn aıqyndaıdy. Sonymen qatar, memleket tarapynan jasalynǵan baǵdarlamalar aıasynda kóptegen aýyl turǵyny tómen baǵadaǵy nesıelerdi alyp, "Agrobıznes -2020", "Jumyspen qamtýdyń  jol kartasy -2020", "Bıznestiń  jol kartasy -2020", "Sybaǵa", "Qulan" sekildi memlekettik baǵdarlamalar arqyly óz kásipterin domalatýda. Aýyl turǵyndarynyń basym kópshiligi mal sharýashylyǵymen aınalysady. Sonymen qatar, aǵymdaǵy jyly aýylda aýqymdy jumystar aqtaryldy. "Monoqalalardy damtytý" baǵdarlamasy sheńberinde Ilıch, Ryqulbekov kóshelerindegi jaıaý júrginshi joldaryna ortasha jóndeý jumystaryna 6344,0 myń teńge qarajat bólingen. Al "Jumyspen qamtý- 2020 jol kartasy» baǵdarlamasy sheńberinde aýylyndaǵy Toqaev kóshesine ortasha jóndeý, Hantaǵy aýylyndaǵy shaǵyn stadıondy jaılastyrý jumystary, aýylyndaǵy " Dańq" aleıasyn ortasha jóndeý jáne aýmaǵyn qaıta qalpyna keltirý jumystary, Ilıch, Ryqulbekov, Imanov, Hantaǵy, Espenbetov kóshelerindegi jaıaý júrginshi joldaryna ortasha jóndeý jumystary júrgizilip, aýyldyń ajary ashyla túsken. 

Kentaý qalasy ákimdiginiń baspasóz ortalyǵynan